Keata apa Yakobo ilayiok tomon oare. Ore Yosef naa enkirotet tiatua ninche. Nenyor Yakobo Yosef oleng’. Ore enkolong’ nabo neisho Yosef ninye olkila sidai lo imuain naapasha. Ore pee edol kulikae ayiok ajo kenyor menye Yosef oleng’ alang’ ninche naa keibaa Yosef oleng’. Ore pee eliki Yosef ninche inkidetidet enye enaikununo enkitoria enye te ninche neponiki enkiba enye.
Ore enkolong’ nabo nelo Yosef enetii ilalashera lenyena tenebo intare.
Neiyieu ilalashera near Yosef kake ore te siadi etimirakaki Yosef ilamirak oopuoito Misiri. Ore pee eidip atimir nepik osarge le nkine olkila le Yosef pee elej menye enaikununo enkeeye e Yosef etiu anaa etaara eng’wuesi olayioni lenye.
Ore te Misiri eiyang’ua Potifa Yosef metaa osinka lenye. Neisiayia Yosef Potifa esidai neyau emayianata enkang’ enye kake etanang’akaki korokoroni tenkaraki elejare e nkitok e Potifa. Ata tiatua korokoroni etamayiana Enkai ninye. Neidim aibelekenya inkidetidet oo ltung’ana oopasha. Ore enkolong’ nabo netum olkingi Farao enkidetidet nainyala indamunot enyena oleng’. Neipot Yosef maeu aibelekeny enkidetidet enye. Neliki Yosef ajo nepuono ilarin oopishana oo intumot sidain pee etum indaiki kumok. Nesuj sii kulo arin kulikae arin oopishana lo lameyu torrono. Neshipayu Farao oleng’ neishoo Yosef eaku olkitok le Misri pooki pee erik Misiri tiatua kulo arin.
Ore pee elotu olameyu ketii sii olameyu e nkop e Kanaan, ewueji enetii Yakobo o ilayiok lenyena. Kake etoning’o ninche ajo ketii endaa Misiri tenkaraki enkipang’ata sidai e Yosef. Neirriwaa Yakob ilayiok lenye Misiri aaingóru endaa. Ore pee ebaiki Misiri, neiyolou Yosef ninche kake meyiolou ninche Yosef.
Tenepuonu enetii Yosef negil kung’ te dukuya ninye. Ore pee elusoo erishata nedol Yosef ajo keata ilalashera lenyena osina sapuk amu etimira Yosef apa te sinkaisho neiyieu neirridu. Neing’urie ninye ninche nejoki. “Kara nanu olalashe linyi Yosef, ilo apa litimirakita enkop e Misiri. Kake ore naa taata emiureishoyu anaa igororo maate, tenkaraki nikitimirakita apa ena kop; amu Enkai apa naaiturukunye nanu maeu aitopok enkishui amu etijing’a olameyu enkop too larin oopishana. Naairriu apa Enkai ene pee aituruku ten tae, pee alotu aitajeu ilekunot ten kop naitasheyie tenkaraki intae pee meye ilkumok. Metaa mme intae apa likirriutua ene kake Enkai; naaeuo aaitaa olkitok oitore enkop pooki e Msiri.”
Ore te siadi, neipoto menye Yakobo meeu Misiri tenebo olmarei pooki. Ore pee elusoo ilarin tomon oopishana neye Yakobo. Nejo ilalashera le Yosef, “Ebaiki taa neibayu iyiook Yosef neitalak iyiook enapa lap nikintaasa iyiook ninye.” Metaa eirriwaitie ninche olkilikuai aairriwaki Yosef ejoki, “Tapalaki iyiook te eng’oki ang’, amu kitaasa entorroni te iyie.”
Kake etiaka Yosef ninche, “Emiureshoyu, katii nanu ewueji e Nkai? Ore te intae, naa entorroni apa kiyiewuakiki; kake eitaa ninye Enkai esidai, pee etum aitopuaa iltung’ana kumok anaa enatiu ena olong’. Metaa emiureishoyu; kaisho intae eretoto tenebo o nkera inyi.” Neijia eikuna aitisipaki ninche neitagol ninche.