Ore pee eidip Isiraeli airridutu te seremata o lashe lo suyai, neaku erishata naitobiri ewueji netumore Enkai o ltung’ana lenyenak. Keji olng’obor. Ore pee enyorraa iltung’ana pooki too ltauja lenye neyau pooki enkishorot sidain pee easishore ilaisiyiaak. Neyau inkishorot kumok oleng’ o metaa nejoki Musa ninche entapal amu iyautua enaaidip esiai pooki. Ore pee eidipayu enchatata olng’obor, neitoip enkatampoi shumata olng’obor neiput enkitoo e Nkai atua ilo ng’obor.
Nebik enkatamboi te shumata olng’obor te rishata naado. Naa ina kata ake epuo iltung’ana loo Siraeli tenelo enkatampoi.
Ore olng’obor naa aisapuk oleng’ neata ilgilat oare. Ore olgilata le dukuya naa Ewueji Sinyati. Ore tiatua ilo gilata netii olperere lo lasar le nkorropil, netii emisa natii imukatini tomon aare te risioroto o loshon loo Isiraeli, netii sii inkitashet o ltaa e sahabu nasila. Ore tedialo olkarasha netii likae gilata oji Ewueji Sinyati oo Sinyat. Ore tiatua ilo gilata netii Osanduku lo Sotua. Ore tiatua ilo sanduku netii nena soitok aare naaigerore inkitanapat tomon.
Nejo Olaitoriani meetae likae tung’ani oibung’ intokitin sinyat meteleku ilapolosak ake naa teneibung’ naa keye. Neput Musa Haron, olalashe lenye metaa Olapolosani Kitok tenebo o eishoi oo Lawi pee eretisho te nkisiayiare o lng’obor nenap intokitin oo lng’obor te rishata enaidurra.
Ore anaake teipa o tedekenya neiyieng’ ilapolosak olkuo lemeata entioto nepej te shumata olperere lo lasar. Naa tenegil oltung’ani nabo oo inkitanapat neyau olkuo le kerr aashu ole kine anaa olasar loo ng’ok. Ore te rishata nabo to lari, te Enkolong’ e Nkitutumoto, neyauni inkineji aare o loing’oni. Neiyieng’i oloing’oni o nkine nabo, nesuakini osarge shumata o Sanduku lo Sotua pee elak ing’ok olapolosani tenebo inoo ltung’ana loo Siraeli. Neibalunye Olapolosani ing’ok oo ltung’ana eibung’ita elukunya enkae kine neyai enkop nalakua olpurkel metaa meitoki ashukunye neya ing’ok pooki oo ltung’ana teilo ari. Meetae ae oitoi naitayunye iltung’ana ing’ok enye meteleku enkoitoi naishoo Enkai ninche.
Ore etii nena pooki, neton ake egolong’aki iltung’ana Olaitoriani. O metabaiki ninye ilayiok le Haron amu eitu eanyit neitu easisho aaitobiraki aapej enkorropil tiatua Ewueji Sinyati. Neirriu Enkai enkima naing’uaa shumata nepej ninche tiatua ilo ng’obor. Nejoki Musa Haron, “Eidipa oshiake Enkai aikoo iyiook pee ejo, “Ore pooki laaisiai nanu neishiakino neanyit esinyatisho ai.”