Ore pee eidip aateshet olng’obor lo Laitoriani nerasaa Enkop Enkisiligata, neton ake egolong’aki iltung’anak loo Siraeli Olaitoriani. Neas pooki ng’ai anaa enaishiakino te dukuya inkonyek enyena. Neany Olaitoriani anaa olaiguanani lenye neiyieuu oopeny olaiguanani lenye maate. Ore olaiguanani le dukuyu, naa Saulo, nemesuj apa Olaitoriani te lulung’ata. Ore enkolong’ nabo neirriwaa Olaitoriani oloiboni lenye Samuel enetii oltung’ani oji enkarna enye Yese te Bethelehem pee eing’oru olaiguanani ogeluno tiatua ilayiok lenyena pokira isiet. Nedamu Samuel ajo kegelu Olaitoriani obo loo layiok sapukin tiatua ninche kake etejo Enkai, “Meneijia. Eing’or tung’ani anaa enaikununo oriong’ kake keing’or Olaitoriani iltauja.” Negelu Olaitoriani Daudi laa ninye olkiti naa olchekut loontare. Nebukoki Samuel ninye eilata aput nelotu engolon o Laitoriani shumata ninye ebaiki ina olong’ neito dukuya.
Ore aa enkiti ayioni Daudi nelo aparan ilalashera lenyena etii olarrabal tenebo Olfilisti. Ore pee ebaiki ilng’obori nedol Goliath ilo Filisti kitok egira aikoroj Isiraeli tenebo Enkai enye tenkaraki etureita enjore pooki erare ninye. Negoro Daudi oleng’ nejoki ilkulikae, “Kaarare nanu ele Filisti.” Ore hoo naa kiti ninye oleng’ nemeiyiolo ataasishore empere o lalem oleng’, kake keyiolo ajo keret Enkai ninye amu ore apa eton egira airrita intare netareto Olaitoriani ninye nemir ing’uesi anaa ilng’atunyo. Ore pee erare Goliath near ninye metuaa tenkopirisiai o soit neisho Isiraeli emirishoi.
Ore pee eaku oloo larin tomoni uni neaku Olkinki tiatua ilarin artam. Ore apa Daudi naa ololarrabal kitok neisiliga Enkai oleng’. Hoo naa etaasa Daudi ing’ok sapukin tiatua enkishui enye kake eirridua ing’ok enyena nepalikini ninye. Ore pee eidip Daudi atimira ilmang’ati lenyena pooki neyau Osanduku lo Sotua atua Yerusalem. Neiyieuu Daudi neshetaki Olaitoriani enkaji kitok. Kake eirriwaka Olaitoriani Daudi olkilikuai ojo, “Mikindim iyie ateshetaki nanu enkaji amu imbukoyie iyie osarge sapuk kake ekeshet olayioni lino ina aji. Kaaisho enkisiligata nchere itum enkayioni naton to lorika le nkitoo intarasi. Kebik enkitoria ino intarasi.” Neisis Daudi Olaitoriani tenkaraki nena kisiligat. Ore hoo duo naa olaing’okoni oiyieu empiris Enkai, oltung’ani apa ninye oata oltau le Nkai.
Neasishore Enkai ninye meigero ilkirempen le seremare tiatua ororei le Nkai.