Neirriu Olaitoriani iloibonok kumok pee eikok iltung’ana le Nkai enaipirta enkiguena Enkai tenkaraki ing’ok enye. Neliki iltung’ana sii enaipirta olng’ur le Nkai teneirridu ninche nepik osiligi lenye atua Enkai. Neitadamu sii ninche enkisiligata o Laitaejeunoni oisiligie apa ninche te rishata nalakua. Nejoki, “Eatae obo laa ninye olotu nelotu aitajeu ntae too ng’ok inyi.” Nejo oloiboni le Nkai Isaya, “Ekeiu ninye eselenkei nemeyiolo olee. Keipoti ninye aajo Emanueli nchere Enkai tenebo iyiook. Ekeipoti sii aajo Olkitok le Seriani. Nebik enkitoria enye entarasi.” Nejoki sii ore ilo Aitajeunoni ketiu ninye anaa olkuo lo lasar, keisilisili kake meng’or ninye kewan, kesukenyi ninye, neye keeya torrono oleng’ pee elak esile pooki oo ng’ok ang’. Kake nejo sii iloibonok kepiu ninye aing’uaa ilootuata.
Neibonu iloibonok kulie baa kumok naasa tenkaraki Olaitajeunoni. Nchere kepuku Olaitajeunoni eing’uaa Bethlehemu, ore inkaik o nkejek enyena naa keremi ninye, kemiri sii te shekeli tomoni uni enkosholai, kekaldaa sii olchore lenye, keshei sii tenebo ilapurrok, neosh inkukuo tenkaraki olkila lenye.
Nelimu sii iloibonok naipirta olning’o ngejuk laa kitabari eimu Olaitajeunoni lo Siligi. Neiro Enkai eimu Yeremia ejo, “Etigila iltung’ana laainei olning’o lai kake ekaitoki aitobir o likae ning’o ngéjuk o ninche. Ekapik inkitanapat aainei atua indamunot enye naiger ninche tiatua iltauja lenye. Ekaaku nanu Enkai enye neaku ninche iltung’ana laainei.”
Nejoki Olaitoriani oloiboni Ezekiel entoki ake naikununo neijia ejo, “Ekaaisho intae oltau ng’ejuk napik enkiyiang’et ng’ejuk atua iltauja linyi; ekaitaiyu tiatua ntae oltau lo soit napik oltau le nkiring’o. Napik Enkiyang’et ai atua ntae naisho intae entusuj inkitanapat aainei.”
Ore pee eidip iltung’ana aatushukoto aashom Yerusalem eing’uaa eararoto e Babylon o enchetata Enkaji e Nkai negira Enkai eitu eitoki airorie ninche tiatua ilarin iip oong’uan. Kake ore teina rishata emoyian o sinaitin ti abori enkitoria o loreren netii kulikae Lyahudi leton ake edamu enkisiligata o Laitajeunoni oyoki alotu. Neaku neanyu ninche ninye te enkisiligata osiligi.