Neipot oltung’ani obo loo Lfarisayo Yesu pee eitoomon te nkaji enye. Nejing’ enkaji e ilo Farisayoi neton anya endaa.
Naa ng’ura, etii enkitok ina anasa, naa enkaasani oo ng’ok; ore pee iyiolou ajo einosita Yesu endaa te nkaji e ilo Farisayoi, neyau oltulet sidai le ilata narropil, neitashe te siadi ninye too nkejek enyena, neiter aituku inkejek enyena too lkiyio, nejut too lpapit le ndukuya enye, neng’utut nkejek enyena, neelie ina ilata.
Ore pee edol ilo Farisayoi oitoomono nejo to oltau, “Te naa koloiboni le Nkai ele tung’ani anaata etayiolo ajo aing’ae anaa kaa pukunoto e nkitok ena aibung’ ninye!” Neirorie Yesu nejoki, “Simon, aata embae naaliki.” Nejoki, “Ee Olaiteng’enani.”
Nejoki, “Eisilenoko oltung’ani aisilenoni iltung’ana aare eropiyiani enyena, neisho obo indinari iip imiet (matejo inkeek iip imiet), neisho olikae onom (matejo inkeek onom). Ore pee elau pokira aare entoki nalakie, nepalaki pokira aare. Amaa te pokira aare, kalo onyorru ninye oleng?”
Newaliki Simon ajoki, “Ajo, elde otapalakaki nkumok.” Nejoki Yesu, “Etisipa ewalata.” Neibelekenyakino enkitok, nejoki Simon, “Idol ena kitok? Aewuo enkaji ino neitu kincho enkare oo nkejek; kake aaitashala ena kitok inkejek aainei too ilkiyio nejut too lpapit lenyena. Eitu king’utut; ore ninye, anaa duoo pee ajing’u eitu aapal maang’utut inkejek aainei. Eitu kiel endukuya te ilata, kake aaela ninye nkejek te na ilata.
Aajoki naa te nkaraki ina, etapalakaki ng’ok enyena, aa kumok, amu etonyorrishe oleng’, amu ore doi olopalakini nkuti naa kiti enyorrata enye.” Nejoki ninye ina kitok, “Kitapalakaki ng’ok inono.”
Ore lelo ootoni aadaa te nebo ninye neiter aajo maate, “Ai ng’ae ele eji opalaki oltung’ani ng’ok?”
Nejoki ina kitok, “Kintajewuo enkirukoto ino; shomo te seriani!”