Ore ake peyie epuonu Musa o lalashe lenye Aaron atumuro ilpayiani kituak loo Siraeli nepuo enetii Farao, nejoki “Etejo Enkai O Siraeli inji, ‘Inchoo iltung’ana lainei epuo pee aitobiraki osirua.’”
Nejoki Farao ninche “kaing’ae Olaitoriani? Mayiolo nanu ninye, nemaisho sii ninche meshomo. Kainyioo pee iyaya iltung’ana aitung’uaa esiai enye? Enchom!” negoro Farao neitoki aitagol esiai enye. Neishiraki ninche Musa.
Neomon Musa Enkai, nejoki Enkai ninye “Shomo tiaki Isiraeli, ‘Atoning’o olkiyioi linyi naa kaitajeu intae te kulo Misiri. Kaitaa intae iltung’ana lainei naa kayau intae ina kop apa naisiligie Abraham, O Isaka tenebo Yakobo.” Neigil Musa o Aaron ashukokino Farao, neiteru taa imbaa aasa tialo olaiguanani le Misiri o Enkai O Siraeli. Ore enedukuya neng’as ninye Aaron aitodolu olmonokie aibelekeny eng’udi metan olasurai kake eitu eiruk Farao, neany eisho nena kera o Siraeli epuo. Neiterunye taa ilmeita. Neitorioo Musa enkaina enye te shumata nkariak e Misiri newal inkariak natii ilkejek, ilturot, inong’ot, mugarri, olchorroi neaku pooki osarge. Ore inkariak natii atua ioketa oo nkeek o ioketa o soito neaku osarge. Ore isinkirr pooki otii olkeju neye nenguoyi olkejuk – neitagol Enkai ottau le Farao.
Neitoki Enkai airriu olmeitai loo nduani e nkare enkop pooki neigil Farao aipotu Musa. “Toomono Enkai meiwuangi kuna tuain, naa kaisho intae ipuopuo.” Neas Musa ina. Kake neibekenya Farao.
Neigil Aaron ailepie eng’udi enye, ore enterit pooki e Misiri neala aaku enkojong’ani. Ore looti ang’eni otaasa kulikae bulabul, kake nelaikino ataas nena, Nejo “ilang’eni Olkimojino le Nkai ele!” kake eitu ake ening Farao.
Neirriu Enkai kulikae meita tialo ile Misiri kake eitu eshoroo inkera oo Siraeli pooki (ore ilojong’a, enkeeya o nkishu, ildututa, enchan o soito, olmaati enaimin) ore te pooki rishata nejo ake Farao “Ayia” ore pee elotu olmeitai, kake nemetiki eisho Isiraeli epuo tenelusoo olmetai.
Nejoki taa Enkai Musa “Aitagolo oltau le Farao pee atumoki aitamio ninche tenkaraki inkaitin enye. Agira aas kulo moniek pee iliki inkera inono o noo nkakuyia inono, niyiolou sii ajo ara Olaitoriani. Kayieu nayau likae meitai obo, naa kelo Farao araa intae pii.”