Ilaikitalak tomon o are ooshomo aikitalan Kanaan:
Ore pee eidip aishoo Enkai Musa inkitanapat toldoinyio le Sinai, nerretena iltung’ana pee ejing Kanaan amu ena apa enkisiligata naishoo Enkai Abraham, Isaak, O Yakobo. Neirriwaa Musa ilaikitalak tomon o are obo ake tiatua lelo gilat, nepuo ninche tiatua ina kop too nkolongi artam egira ayiolou enaika tenerasaki ina kop.
Ore pee eshukunyie lelo aikitalak, nenyorrakino pooki inchere ore Kanaan naa enkop napirr, naruko kule o naishi, kake ore tomon lenye neyau ilkiliku torrok inchere ore iltung’ana leina kop, o suntan e ina kop naa sapuki oleng’, negol sii, nemeidim ake Isiraeli atimirr ninche. Ore ilaikitalak aare, Yoshua o Kaleb, neiruko ninche inchere kemirr ina kop to larrabal lelo mang’ati lenye, amu keretu iyiook Enkai anaa enaikuna te Misiri. Kake negolong’u olorere neany ejing.
Negoro Enkai oleng’, neyau enkiguana shumata ninche Isiraeli. Neibalunyie sii ina rishata ajo inchere meata obo oitogiroyie ilarin tikitam ojing atua ina kop, enkisiligata. Naa kepuo sii Israeli aman orpukel o metuata ina ishoi pooki – ilarin artam.
Ilarin artam torpurkel/entoki neitu enyorraa Isiraeli
Neaku nemanaa Isiraeli. Nerikoo ninche Musa naa ore too rishat pooki neisho Enkai ninche endaa (manna o ingurlen naing’uaa keperr) o enkare tenkoitoi e nking’asia. Kake neingunyunguny ake olorere. Ore kulie rishat neingunyungunyaki Musa ejo “Kainyioo pee iyawua iyiook te Misiri pee kipuonu aye tele purkel? Amu mikiata enkare o mukateni – nimikiyieu manna!”
Negero olaitoriani. Neirriu ilasuria atua olerere neiteru aony ninche. Neiteru olorere aaye nepuonu enetii Musa nejoki, “ kitaasa iyiook eng’oki aingunyungunyaki Enkai tenebo iyie. Tasayiaki iyiook Olaitoriani, meiwuangakinyie iyiook kulo asuriaa.” Neomonoki Musa iltung’ana.
Nejoki Enkai Musa meitayu enkitanyaanyukoto olasurai lo suyai obo neik ninye te shumata olchata. Ore ake pooki ng’ae oony olasurai, ore ake pee eing’or ilo asurai lo suyai, nejeu. Neitayu Musa olasurai lo suyai nepik te shumata ilo shata.
Ore ake pee eony pooki ng’ae olasurai, ore ake pee eing’or ilo asurai lo suyai, nepok.
Enjing’ata e Nkop e Nkisiligata:
Ore enabayie, etulusoitie ilarin artam tiatua orpurkel, neyau Enkai Isiraeli olpolosie leina kop e nkisiligata. Nelo Enkai agelu Yoshua metoriko ninche ina kop.
Ore eton eitu eye Musa, neitadamua iltung’ana pee meserem ake aekata inkitanyaanyukot naitae inkaitin natii Kanaan, pee mewuasai ake nerikino ninche ing’ok enye, neitadamu ninche pee edamu enyorrata e Nkai, o enkisiligata naishoo Abraham, Isaka o Yakobo. Neibung’ ilo ning’o teneyieu nemayiani. Neitadamu
ninche inchere keitame ninche Enkai tenepuo Aserem kulie aitin, kake ore ake pee eirridu, neing’oru Olaitoriani, nening ninye, neing’urrie ninche Enkai.
Ore eyia nejia, ore tialo erikore e Yoshua, nelang olosho loo Siraeli eim atua olkeju le Yordan ten kop natoyio neiteru arasaki ina kop.