Ore anaa pee eirish, neidimu Isiraeli, iltung’ana le Kanaan, neya ilgilat pokira tomon o are ina kop. Neaku esiai apa enye pee earaa iltung’ana pooki otii atua Kanaan leton apa etii atua ina kop, peyie meshulare ake ninche, neiteru ainyial ninche nena kitanyaanyukot naseremi. Ore peyie eidip Yoshua atua, neitore ate ilgilat le Isiraeli. Ore peyie eiteru ashipakino, neiteru sii akarsisu teina kop ng’ejuk, nerikino ina apa naitanapa ninche Enkai. Inji kiindim atejo ina rishata: “neas pooki tung’ani enaba anaa enayieu too nkonyek enyana.”
Nejoki Olmalaika lo Laitoriani iltung’ana, “Ore peyie aitayu intae aitung’uaa Misiri natiaka intae, “Eminchosho ake ile Kanaani emany enkop tenebo intae.” Kake itigila intae ilo ning’o tialo iyiook. Inchoo Ilkanaani eshulare intae, neitu igiligili ilperere lenye, neitu ipejoo inkaitin enye. Neaku, mekure sii nanu araa ninche teina kop inyi. Keaku ninche olkikuei te ntae, nerresh intae nkaitin enye.”
Naa ina ake nataase. Nerikino ina ishoi pooki kiti Enkai. Neiteru aaserem inkaitin oo ilkanaani, neas imbususi. Neiteru ilmangati airish ninche, neaku ore pooki kata napuo Isiraeli olarrabal, negilunore ninche Enkai, nemiri ninche. Ore pee eitoki aaku isinkan eniare, nedamu ninche Enkai, neipot neomon ninye meeu aitajeu ninche. Nedumu Enkai olarikoni, oji olarishani, oitajewuo ninche aigil.
Kake ore tenkiti rishata, nerikino ninche Enkai. Neiterunye emanaroto aigil naijo enkae. Katitin tomon oo ng’uan eitu ninye ebaya iip uni o onom, neitoki inkera o Siraeli aibelekenya aing’uaa Enkai neiteru aaserem inkaitin o Ilkanaani! Ore te pooki rishata, neitame ninche Enkai anaa apake enatejo pee eisho ninche inkitanapat tomon toldoinyio le Sinai. Kake ore te pooki kata nairridu inkera o Siraeli tialo eng’oki enye neibung olning’o, nepaliki Enkai ninche. Neiteru Enkai amayian ninche aigil. Naa keji ena, erishata oo larishak. Ore kulikae arishak arashu aitajeunok naa ketii Gidion, Debora tenebo Samson. Ore apa olobayie naa Emmanuel.