Ore apa te nkiterunoto e pooki toki, neitaa Enkai keper o enkop too inkolong’i ile. Ore apa enkop nemeeta shoto, nemetii toki, naa enaimin ake natii oriong’ o enguton oo nkariak. Ore Enkiyang’et e Nkai neloolo tioriong’ inkariak.
Nejo Enkai; “Inchoo metijing’a ewang’an.” Nejing’ ewang’an. Nedol Enkai ajo aisidai ewang’an. Nerishu Enkai ewang’an aitung’uaa enaimin. Neipot Enkai ewang’an ajo endama, neipot enaimin ajo enkewarie. Neaku eetae enteipa o entadekenya enkolong’ e dukuya.
Nejo Enkai: “Inchoo metaa ketii oloing’ang’e erishata oo nkariak, naa inchoo metirisha inkariak e shumata o nkariak e abori.” Neaku neijia. Neipot Enkai oloing’ang’e ajo Keper. Neaku teipa neaku tadekenya enkolong’ e are.
Nejo Enkai: “Inchoo inkariak natii abori e keper eiturrurrokino pooki nebo, naa inchoo enkop natoyio eibalayu.” Neaku neija. Neipot Enkai enkop natoiyio ajo Enkop, neipot inkariak naaiturrurro tenebo ajo inaaiposha. Nedol Enkai ajo aisidai.
Nejo Enkai: “Inchoo enkop metoiu inkaitubulu, o lkeek loo lng’anayio ooiu ilanterera too mpukunot enye te enkop.” Neaku neija. Nedol Enkai ajo ai sidai.
Neaku teipa neaku tadekenya enkolong’ e uni.
Nejo Enkai, “Inchoo metaa keetae iwang’aritin to loing’ang’e le keper peyie erishu endama te nkewarie, neaku sii ilooitodolu ilmonek too nkatitin oo nkolong’i o larin.” Neaku neija. Neitayu Enkai iwang’aritin are sapuki – naa enkolong’pee eitore endama, o lapa pee eitore enkewarie. Neitayu sii ilakir. Nedol Enkai ajo aisidai. Neaku teipa neaku tadekenya enkolong’ e ong’uan.
Nejo Enkai, “Inchoo metijing’a nkariak ntokitin naaishu (anaa sinkirr), inchoo sii imotonyi meshomo to loing’ang’e le keper o meiputa enkop.” Nemayian Enkai ninche pee eponari too mpukunot enye. Nedol Enkai ajo aisidai. Neaku teipa neaku tadekenya enkolong’ e imiet.
Nejo Enkai, “Inchoo enkop meiputa ng’uesi pooki naaishu, inkishu o ng’uesi e ntim o ng’uesi naaiserpepiari te nkop.” Neaku neija. Nemayian Enkai ninche pee eponari too mpukunot enye. Nedol Enkai ajo aisidai.
Nejo Enkai; “Emaitobira oltung’ani te nkitanyaanyukoto ang’ onyaanyukie iyiook, nikincho ninche meitoria pooki toki naitobira. Neaku etaasa Enkai ina.
Neitayu Enkai oltung’ani te nkitanyaanyukoto enye makewan, olee o enkitok. Nemayian Enkai ninche, nejoki “Entoisho, entoponari, emputa enkop. Entoria enkop pooki o pooki toki naishu. Neisho sii Enkai ninche inkaitubulu sidan meinosa aitaa endaa. Nedol Enkai ajo aisidai oleng’! Neaku teipa neaku tadekenya enkolong’ e ile.
Ore te nkolong’ e naapishana, eidipa Enkai aitobira pooki toki, neyeng’iyeng’a. Metaa etamayiana Enkai enkolong’ e naapishana neitisiny, amu teina olong’ apa eyeng’iyeng’e Enkai te siaai enye pooki nataasa e nkitobirare.