Ore pee eeye Yosef, netumi likae kinki te Misiri lemeyiolo Yosef. Naa keure Israeli neitaa ninche irrindiki. Neitayu enkitanapata nchere ore pooki ayioni naaini tiatua Israeli neari metua. Neisudoo olmarei obo loo Lawi enkerai enye ayioni tiatua enkikapu nepik ninye atua olkeju le Nail. Netum enkayioni entito olkinki neitubulu ninye anaa enkerai enye. Nebulu Musa tiatua enkaji o lkinki. Kake ore enkolong’ nabo near metua oltung’ani loo Lmisiri oorit apa oltung’ani loo Sraeli.
Neisik Musa alo olpurkel.
Ore apa Musa naa o loo larin artam pee eisik te Misiri. Nebik to lpurkel kulikae arin artam neyam Zippora, entito o lapolosani Yethro le Midian.
Ore enkolong’ nabo, egira Musa airrita intare o laputani lenye te mbata Oldoinyo le Sinai. Neipang’aki ninye olmalaika lo Laitoriani te nkima esanag naiyupuyup. Kake nedol Musa enkima te sanag kake menya ninye. Neing’asia ninye Musa nenyikaki alo aing’or. Neipot Olaitoriani ninye tiatua ina sanag nejo, “Musa, Musa!”
Newaliki Musa ajo, “Nele nanu.”
Nejoki Enkai, “Milotu anyiku. Intayu namuka amu aisinyati ene nintasheyie.” Nejoki, “Ara nanu Enkai e papai lino Abraham o Enkai e Isak o Enkai e Yakobo.” Ore pee ening’ ina, neisudoo Musa enkomom enye amu meitiu aing’ura Enkai.
Nejoki Olaitoriani Musa, “Atodua osina loo ltung’ana laainei o sinkaisho tiatua enkop e Misiri. Kayieu naitajeu ninche nayau ninche enkop enkisiligata. Kaairriwa iyie. Shomo enetii Farao, olkinki le Misiri, pee intayu iltungana lainei le Israel aitung’uaa Misiri.”
Kake nejoki Musa Olaitoriani, “Amaa kara nanu ng’ae olo enetii Farao aitayu iltung’ana lo Israeli aitung’uaa Misiri?”
Nejoki Enkai Musa, “Atii nanu tenebo iyie. Naa keaku ena olmonekie te iyie pee aaitodol ajo nanu laairriwaa: ore pee intayu iltung’ana aitung’uaa enkop e Misiri nikiserememe nanu tele doinyo.”
Nejoki Musa Olaitoriani, “Amaa tenalo enetii iltung’ana loo Siraeli naajoki ninche, ‘Enkai e papai linyi naairriwua nanu’ naaikilikuan ninche aajoki, ‘Keijiaa enkarna enye?’ Kaa ajoki ninche?”
Nejoki Enkai Musa, “ARA NANU ILO ORA.” Naa ena tiaki ninche. “KARA NANU laairriwua nanu enitii.’”
Kake nejo Musa, “Kake o tenemaairuk nanu?”
Neibung’ita Musa eng’udi te nkaina enye. Nejoki Enkai ninye, “Irragie ina ng’udi ten kop.” Neiko Musa neijia neaku eng’udi olasurai! Nejoki Enkai ninye, “Tudumu imbung’a olkidong’oi.” Neibung’ Musa neitoki aaku eng’udi. Nejoki Enkai ninye, “Tipika enkaina ino atua olkila. Ore pee eitayu neibung’a enkeeya oo lbolot. Kake ore pee eitoki ashukoki atua olkila neishiuu. Nejoki Enkai ninye, “Pee intodol ninche kuna kitoduat pee eiruk nchere Olaitoriani, Enkai oo loo papai lenye linkimpang’aka iyie.”
Nenyorra Musa neshuko alo enkop e Misiri.