Ore pee eidip Enkai aitarruoi inkutukie te Babeli, netii apa oltung’ani oji Abram. Naa keata ninye ilarin intomoni naapishana o imiet te moruao enye naa etamorua sii enkitok enye naji Sarah. Nemeata inkera pokira. Ore te nkolong’ nabo, neipang’aki Enkai Abram nejoki, “Abram, tupuku shomo tung’uai enkop ino o ltung’ana linono le sotua, o enkaji e papaai lino, shomo enkop naautaki. Naa kaaitainye iyie olosho sapuk, naitaa enkarna ino kitok metaa iyaku emayianata.
Ekamayian lelo likimayian, naa kadek lelo likidek. Naa kemayiani iloshon pooki tenkaraki iyie.”
Neaku neya Abram Sarah o olenkapu lenye oji Lot neaku keiteru o masaa enyenak aapuo abori e kopkop. Ore pee ebaiki enkop e Kanaan, nejoki Enkai, “Nena ina kop. Kaisho eishoi ino ena kop.” Neaku etamanya ninche ine. Neshetaki Abram Enkai teine olperere lo lasar pee eisho Enkai enashe.
Netii apa ina kop olameyu sapuk oleng’. Nedou Abram alotu enkop e Misiri aparan. Ore pee ebaiki olpolosie le Misiri, Nejoki Abram Sarah, “Ira enkitok sidai oleng’. Neaku ore olikidol iyie naa kaar nanu matua pee kitum aawa anaa enkitok enye. Neaku meata inchere pee mijoki ira enkanashe ai.” Nenyoraa Sarah nepuo aajing’atau Misiri.
Ore te Misiri netii apa iltung’ana oogol, oonyikita olkinki le Misiri oleng. Nedol ninche Sarah neliki olkinki, neya olkinki Sarah metaa nabo o inkituaak enyenak. Neisho sii inkishorot kumok Abram, anaa inkishu, intare, inkineji, oo iropiyiani sii. Kake nedek Enkai olkinki tenkaraki ina. Ore pee eyiolou olkinki ajo eteleja Abram ninye, neirriu Sarah ashuku enetii Abram, nejoki Abram, “Amaa, kainyoo pee kiteleja? Kainyoo pee kitiaka eji ore Sarah naa enkanashe ino kake enkitok ino. Neaku enchom! Entung’uai ena kop!”
Neaku eshomo Abram o lmarei lenye aashuko aapuo shumata ina kop e Kanaan nemany ine. Neaku Abram olkarsis teine.