Etunukayioki Yesu eton eitu edoyioroto enkolong’ Ijumaa, nepik Pilato isikarini oong’uan te nkurare. Neyeng’iyeng’a inkituak naairiamunore Yesu eing’uaa Galilaya enkolong’ nasuja tenkaraki Sabato. Ore te nkolong’ e uni, arashu te enkolong’ e dukuya e wiki, enasirie, nepuo enkurare meitobira osesen le Yesu. Ore pee epuo enkurare nejokino maate, “Ae ng’ae ade oret iyiook aibeleleng’oo osoit te nkutuk e nkurare?” Ore ina kata nejing’ enkikirikirata kitok enkop, amu etadowuo olmalaika lo Laitoriani oing’uaa shumata, nelotu neibeleleng’oo osoit netonie enchumata. Neikirikira ilarripok te nkaraki ninye, netiu anaa ilootuata.
Nejoki ilo malaika inkituak, “Emiureishoyu intae; amu ayiolo ajo Yesu ing’oruru otashoki. Metii ene amu etopiwuo anaa enatejo ninye. Wootu eng’urai ewueji neirragieki. Naa enchom entasiooi entoliki ilooiteng’eni lenyena entiaaki, “Etopiwuo aing’uaa lootuata; neituruko alo Galilaya, naa te ine idolidolo.” Nepuo nabo kata aing’uaa enkurare te nkuretisho o te ng’ida sapuk, nekuet aaliki ilooiteng’eni.
Ore pee ebaiki inkituak ilooiteng’eni lenye, neliki pooki tooki nataase. Kake eitu eiruk ilkumok. Kake nekuet Petero o Yohana enkurare. Ore pee ebaiki Petero enkurare nejing’ nedol ilkarash le kitani eirrag oopeny, nerrinyo alo ang eing’asia te nena naatotiwuo.
Ore pee eshuko enetii ilkulikae looiteng’eni neliki imbaa naatodua.
Neing’asia ilkulikae sii tenkaraki etopiwuo Yesu. Ore pee elusoo erishata dorop neipang’aki Yesu ninche ewueji neisudori maate neitashe ti atua ninche. Neing’asia, neiruk sii! Kake metii oloiteng’eni oji Tomas. Ore pee eliki ninye ajo eipang’anki Yesu nemeiruk, nejo, “Te neitu adol nanu inkiporo oo lmushumaani too nkaik enyena napik olkimojino lai ine wueji oo lmushumaani napik enkaina ai ematua enye, mairuk nanu katukul!
Ore etulusoitie inkolong’i isiet neitoki aatii lelo ooiteng’eni atua aji, netii Tomas te nebo ninche. Nelotu Yesu eikeno nkutukie e ina aji, neitashe te mpolos nejo, “Entaseriana.” Neitoki ajoki Tomas, “Tipika olkimojino lino ene, ing’ura inkaik aainei, nipik enkaina ino ene mbung’a ematua ai nimiaku olemeeta enkirukoto kake iruko.” Newaliki Tomas ajoki, “Olaitoriani lai naa Enkai ai!” Nejoki Yesu ninye, “Iruko iyie te nkaraki nikitoduaa nanu? Emayiani lelo leitu edol neiruko.”