Ore ena naa enkatini e Endaa o Laitoriani. Kegira apa ilapolosak kitok o ilaiteng’enak loo nkitanapat aing’oru enkoitoi mear Yesu metua. Etijing’a Shetani Yudas Iskariot, olaa obo le lelo tomon o aare, nedumunye alo aning’ore ilapolosak kituaak o sikarini eneiko pee ekaldaa Yesu te ninche. Nenyorraa pee eisho mpesai.
Ore pee ebaya esaa, neton adaa Pasaka, netoni ilkipaareta lenyena te nebo ninye. Nejoki ninche, “Atayiewua oleng’ nanya ena Pasaka te nebo intae eton eitu aaisilisili. Amu ajoki intae, meekure aitoki ai kata anya o meitabari te nkitoria e Nkai... Kake eng’ura amu etii ilo laaitarasaa ena mesa te nebo nanu. Amu eikunari Enkerai e Tung’ani anaa enatejoki apake; kake ee kake aiyia ilo laa ninye oitarasaa!”
Neiteru ilooiteng’eni lenye aaikilikiuana maate, aajoki kalo pasa oiko neijia. Newaliki Yesu ajoki, “Ilo laisho endung’oti aidipa aitadoiki.” Ore pee eidip aitadoiki, neitayu neisho Yudas Iskariot. Ore pee eidip Yudas atang’amai endung’oti nejing’ Shetani atua ninye. Neaku etiaka Yesu ninye, “Tasioki taasa eniaas.” Ore pee eng’amaa ninye endung’oti neipang’ nabo kata; naa kewarie.
Neaku edumu Yesu emukate, ore pee eisho Enkai enashe nebel neisho ninche ejo, “Osesen lai ele oishoori te nkaraki intae. Entaas ena kidamumu nanu.” Neiko neijia enkikompe eidipa endaa, ejo, “Ore ena kikompe osotua ng’ejuk oitaiki intae osarge lai, oibukori te nkaraki intae te mpalakinoto oo ng’ok.
Ore pee eidipa ainosa emukate naok enkikompe, nejoki Yesu ninche, “Isikisiki ade pooki aailanyisho, kake ore pee aaitopiuni, naituruk te intae alo Galilaya.” Nejo pooki ajo meidim aisika. Ore pee erany osinkolio neipung aapuo olchampa le Gatsemane ti oldoinyo loo Loirienito.