Ore te ina olong’ ake, juma pili, epuo aare lenye enkang’ naji Emmaus, naa kilomita naapishana ing’uaa Yerusalem, neimaki pokira aare nena baa naatotiwuo. Ore einosaa lomon neinepu Yesu openy airiamariyie ninche. Neikeno inkonyek enye pee meyiolou.
Nejoki Yesu ninche, “Kakua omon kulo liimakiki ipuopuo pokira aare?” Neitashe neisinanuo. Ore obo lenye newaliki ajoki ninye, “Keiyie doi ake olomoni te Yersusalem lemeyiolo kuna baa naatotiutuo te ine te kuna olong’i?
Nejoki, “Akua baa?”
“Nejoki ninche ninye, “Mbaa e Yesu le Nasaret, ora apa oloiboni le Nkai ogol, kake eitarasaa ilapolosak lang’ kituaak o laitoriak metudung’okini enkiguana metari metua, neshei ninye. Kake kisilig apa iyiook aajo ninye olaku Siraeli.
Ee pae naa ore etii nena pooki, enkolong’ e uni duoo taata anaa netiu nena baa. Ore sii, etayookito inkituaak tiatua iloiteng’ena lenye enkurare duoo enasirie neitu einepu ilo sesen; neshukunye aajoki iyiook eji etoduaa ilmalaika, ootiaakita keishu. Nepuo sii kulikae lang’ enkurare, nepuo ainepu etiu ake anaa ina natolimutuo nkituaak; kake ninye ake eitu edol.”
Nejoki ninye ninche, “Lo tung’ana moda, nirara yietuti ltauja mirukuruku nena pooki naatejo loibonok le Nkai! Keeta apa kata nemeitamei Kristo aaiko neijia pee ejing’ enkitoo enye?” Neiteru too mbukui e Musa o too loibonok pooki, neibalakinye ninche ilkigerot ooipirta Olaitajeunoni O Siligi.
Ometaa nenyikaki ina ang’ apa napuo. Neiko ninye anaa keyieu negiroo. Kake neibok ninche ninye, aajoki, “Irraga iyiook amu emuto netaa kewarie.” Nejing’ taa aton te nebo ninche.
Ore enya endaa te nebo ninche, nedumu emukate nemayian, negil, neisho ninche. Nebolo inkonyek enye neyiolou ninye; neimisilori ina kata ake neitu eitoki nkonyek enye aadol. Nejokino, “Keitu eyupuyup iltauja lang’ eirorie iyiook te nkoitoi, eboloki iyiook, ilkigerot?”
Neinyototo ake te ina saa nerrinyo Yerusalem; neinepu lelo tomon o obo o lelo ooboitare, ootiaakita, “Etopiwuo taa ninye Olaitoriani neipang’aka Simon!”
Neliki taa ninche nena baa naatotiwuo te nkoitoi, e eneikuna pee eitayiolo kewan ninche ebelaki emukate.