Negiroo ilarin iip oong’uan eidipa Enkai airorie Israeli eimu iloibonok. Negira Enkai pi, naa ore Ilyahudi nejing’ atua enkitoria o Ilroma. Kake ore enkolong’ nabo, neitoki airo Enkai! Neirriwaa olmalaika meirorie Zakaria, obo lo lopolosak le Nkaji e Nkai. Neliki ajo ore Elisabet, enkitok enye,naa keiu enkayioni nalotu alimu elotunoto o Laitajeunoni lo siligi. Kake eitu eiruk Zakaria Enkai amu etaa morua ninye o nkitok enye nemeata hoo enkerai nabo. Kake etaasa Enkai enetejo neiu Elisabet enkayioni naji Yohana. Naa ninye olikioo ti ong’ata enaikununo elotunoto o Laitajeunoni.
Ore eidipa ilapaitin ile eirorie olmalaika Zakaria, neitoki Enkai arriu olmalaika oji Gabrieli enkop e Galilaya enkanasa e Nazareti enkaji entito nemeyiolo olee naji Mariamu. Ore ninye naa enkanashe Elizabet. Etisiraki Mariamu olpayian oji Yosef laa ololmarei le Daudi.
Nejoki olmalaika Mariamu, “Takuenya, na kirotet e Nkai.” Ore Mariamu neing’asia neurishoyu. Nejoki Gabrieli “Miurishoyu. Kitamayiana Enkai naa iiu enkayioni nimpot ajo Yesu. Naa keaku kitok neji Oinoti lo Lotii Shumata aisul. Keisho Enkai ninye olorika le nkitoo le Daudi menye lenye. Neitore olgilata le Yakobo intarasi. Nemeiting’ enkitoria enye.”
Ore pee eiyiolou Yosef enaikununo enutai e Mariamu, nemeyieu nesul ninye amu oltung’ani loo sipat neiyieu neleliari aing’uaa. Kake ore eton eitu eas neijia, nelotu olmalaika tenkidetidet nejoki, “Yosef, miurishoyu iya Mariamu anaa enkitok ino amu, ore enutai naata Mariamu eno ltau Sinyati. Naa keiu enkayioni naa impot enkarna enye ajo Yesu, enkipirta enye ‘Olaitoriani oitajeu,’ amu keitajeu iltung’ana lenye too ng’ok enye.” Ore pee edumunye Yosef tenkidetidet enye, nerik Mariamu anaa enkitok enye kake eitu eirrag o ninye eton eitu eini Yesu.
Ore etolusoitie ilapaitin ile etoiwuoki Yohana netaa keisho Mariamu. Ore ina kata nejo olkinki lo Roma inchere lasima ore iltung’ana pooki pee eshuko eneing’uaa too nkuapi enye pee etumi aaikena tenkaraki kodi. Ore Yosef neshuko alo enkanasa e Bethlehem naing’uaa olmarei le Daudi pee etumi aigero tenebo Mariamu.
Neaku kumok iltung’ana ootushukote aapuo Bethlehem neaku metii ewueji neirragie Yosef o Mariamu amu eipute. Neaku enotito olale airragie. Ore etii ine, neiu Mariamu enkayioni neishopoki inkilani e keraisho neirragie te mpeut oo inkishu.
Ore te ina kop netii ilchekuti ootoni aarip intare kewarie. Neipang’aki olmalaika lo Laitoriani neimerlelu esikar o Laitoriani too nkaloli pooki, neiureishoyu ninche oleng’. Nejoki olmalaika ninche, “Emiureishoyu amu ilomon supati le ng’ida kitok ayau, neaku too ltung’ana pooki, amu ore te nkang’ e Daudi, etoiwuoki Olaitajeunoni, te nkaraki intae, laa ninye Kristo, Olaitoriani. Naa ele omonekie te intae; itumutumu elooyo naishopokino nkilani e keraisho, neirragita te mpeut oo nkishu.” Neboitare ilo malaika, olorora kitok le shumata oisis Enkai ejo, “Meisisi Enkai te shumata naisul te pooki, neaku osotua tena kop, too ltung’ana pooki laa ninche eshipakino ninye!”
Ore pee epuo lelo malaika shumata aaing’uaa ninche, nejokino ilchekuti, “Enyeito emaape aabaya Bethlehem, aadol ena bae nataase naitayiolo iyiook Olaitoriani.” Neisarrisar aapuo neinepu Mariamu o Yosef, neirragie elooyo te mpeut. Ore pee edol neinosu ninche lomon ootiaakaki te nkaraki ina looyo. Ore lelo pooki ootoning’o nena naatolimutuo ilchekuti neing’asia. Kake eiteng’ela Mariamu nena baa pooki edamu to ltau lenye. Neshuko lelo shekuti eisho Enkai enkitoo neisis too mbaa pooki naatoning’o o naatoduaa anaa enatiaakaki ninche.