Ore nabo olong’ eboitare Yesu ilkipaareta lenyena nepuonu iltung’ana kumok enetii nemeata erishata nainosie endaa. Nejoki Yesu ninche, “Wootu oopeny emaape eneliyio, ayeng’iyeng’a enkiti kata.”
Nepuo te mpeut ewueji neliyio aa ninche ake oopeny. Kake etodua iltung’ana kumok ninche, neyiolou ninche, neipirri aapuo too nkejek, neng’asie ninche ine wueji. Ore pee edou Yesu te mpeut nedol olorora kitok, neing’urrie ninche, amu etiu anaa intare nemeeta olchekut; neiteru aiteng’en mbaa kumok.
Ore pee emutu, nepuonu ilooiteng’eni lenyena enetii, nejoki, “Keliyio ene wueji, nemuto; intanapa ninche, meshomo kuna ang’itie naamanita ene aainyang’aki ate entoki nanya.” Kake etawalikia ninye ajoki ninche, “Enchoo intae ninche entoki nanya.”
Neing’asi ninche! Nejoki, “Ai! Mikindim! Eikumok kulo tung’ana oleng’!
Mikiata iropiyani naaidip.” Nejoki ninche, “Kaja mukateni niatata intae? Enchom eng’urai.” Ore pee eing’oraa neyiolou, nejoki, “Imiet o sinkir aare.”
Neitanap meitotona olorere too nkujit naanyori, anaa iltimito. Ore pee edumu Yesu nena mukateni imiet o sinkir aare neraposhu inkonyek aing’or shumata, nemayian, nebel imukateni neisho ilooiteng’eni lenyena meishoo lelo tung’ana; neoriki lelo sinkir aare ninche pooki. Nenya pooki neraposho. Nesotu imbelat naatelekuaki o noo sinkir sii neiput inkikapuni tomon o aare. Ore lelo oinosa nena mukateni nera nkalifuni imiet ilewa, netii sii intomonok o nkera.