Etii apa emuyei oleng’ oltung’ani oji Lazaro, olalashe le Marisa o Mariamu naa olchore le Yesu. Neirriwaki inkanashera Yesu olkilikuai ejo, “Lo Kitok, ng’urai, emuei oloshi linyor.” Ore pee ening’ Yesu ina nejo, “Mme ene keeya ena mueyian, kake ene nkitoo e Nkai.”
Nenyor apa Yesu Lazaro o inkanashera enye, kake etobiko enetii inkolong’i are eton eitu elo enkang’ e Lazaro tenebo iloiteng’eni lenye. Nelike ninche, “Etua Lazaro, nang’ida nanu te nkaraki intae inchere matii ine, pee itumutumu aairuko. Kake enyeito maape enetii ninye.” Ore pee elotu Yesu nenyorriki etobiko Lazaro te nkurare inkolong’i ong’uan. Ore pee ebaiki enkang’ nedol ajo etii iltung’ana kumok aaitigir inkanashera. Nelotu Marisa enetii Yesu nejoki, “Lo Kitok, te naa itii apa ene anaata eitu eye olalashe lai. Kake ore o taata, ayiolo ajo ore embae pooki niomonu te Nkai, aikincho iyie.”
Nejoki Yesu ninye, “Kepiu olalashe lino aitoki.” Nejoki Marisa, “Ayiolo ajo keitoki apiu te mpiunoto e nkiting’oto.” Nejoki Yesu ninye, “Ara nanu empiunoto nara enkishui. Ore ilo laairuk nanu, ore ninye te neye, neishu; ore pooki oishu laairuk nanu nemeye intarasi. Iruko iyie kuna?” Nejoki, “Ee Olaitoriani, airuko inchere ira Kristo, Enkerai e Nkai nalotu enkop.” Nelotu sii Mariamu enetii Yesu nebatata too nkejek enyena nejoki, “Lo Kitok, te naa itii apa ene anaata eitu eye olalashe lai.” Ore pee edol Yesu enkurare neishir. Nejo iltung’ana, “Eng’ura eneba enyorrata nanyor ninye!”
Ore pee ebaiki Yesu enkurare nejo, “Ewuang’ie osoit te nkurare.” Ore Marisa nejoki ninye, “Lo Kitok, etong’ua taata, amu inkolong’i ong’uan anaa neye.” Nejoki Yesu ninye, “Tiniruk iyie nidol enkitoo e Nkai.” Neaku, eiwuang’ie ninche osoit; nedumu Yesu inkonyek aing’or shumata nejo, “Papa aaisho enashe amu kitoning’o pee eiruk kulo tung’ana nchere iyie likirriwua.” Ore pee eidip atejo neijia, nebuak ninye to ltoilo sapuk ajo, “Lazaro, tupuku boo!” Nepuku lido otua. Nejoki Yesu ninche, “Entalak too nkarash naanukarieki iltung’ana ninchosho ninye meshomo.” Neaku keiruk iltung’ana kumok Yesu ena olong’.