Ore nabo olong’, ketii Yesu o ilkipaareta okuni oldoinyo neshukoo enetii ilkulikae ooiteng’eni, nedol emanita olorere kitok, neishankarrarre ilaiteng’enak loo nkitanapat ninche. Ore ake pee edol ilo orere Yesu, neing’asia oleng’, nekuetiki aairoroki. Neikilikuan ajoki ninche, “Ainyoo doi ena shankar niaatata o ninche?” Newaliki oltung’ani obo te ina siamo ajoki, “Olaiteng’enani, atorikuo duoo enkayioni ai enitii, eeta oloirirua lemeiro; olaa ore pee eibung’ nenang’ie enkop; neitayu ilabur, nenya lala neikaolo; najo ajoki ilooiteng’eni linono metaarai, nelaikino.”
Newaliki ajoki ninche, “Wooi ena ishoi nemeeta enkirukoto! Kebaa aton aboitare intae? Kapal intae o anu? Entoriku ninye ene natii.” Nerikokini; ore pee edol ilo oirirua Yesu neiterreyie nabo kata, nebatata ten kop neiperipera, neitayu ilabur te nkutuk. Neikilikuan Yesu menye enkerai ajoki, “Kebaya aa nkat eeta ena pukunoto?” Nejo, “Te kereisho eiterua. Naa katitin kmok etanang’aka ninye atua enkima nenang’anki ankare ejo aar; kake te nindim iyie ataasa ae, ing’urrie iyiook taretu iyiook.” Nejoki Yesu ninye, “Eji te nindim! Eidimayu imbaa pooki to loiruk.” Nebuak nabo kata menye ina ayioni nejo, “Airuko, ore eneton eitu airuk taretokoki!”
Ore pee edol Yesu olorere ekuetu aasotokino, neing’ode ilo oirirua oiduruk, nejoki, “Lo oirirua ming’ani lemeiro, nanu laaitore, tupuku tung’uai, nimingil ajing’ ae kata.” Nebuaku aishir neiterreyie aipushupush oleng’, nepuku, netiu enkayioni anaa olmeneng’ani o metejo ilkumok, “Ae etua!” Kake eibung’a Yesu enkaina nedumu, nenyototo aitashe. Ore pee ejing’ atua aji, neikilikuan ilooiteng’eni lenyena too iyiook aataaarai ninye?” Nejok, “Meararoyu ena pukunoto ti ae neme te nkomono ake.”
Nepuo te ine neimaa Galilaya. Nemeyieu Yesu neyiolou hoo oltung’ani: amu ilooiteng’eni lenyena eiteng’enita, ajoki, “Eitarasakini Enkerai e Tung’ani nkaik oo ltung’ana, near ninche ninye metua; ore pee eidipi aatar metua, neishari nkolong’I uni nepiu.” Kake eitu ening’u ninche ina natejo, neureyu sii eikilikuan.”