Neye Yosefu naa ore tiatua ilarin iip ong’uan nebul olmarei le Yakobo oleng’ te lalai neipoti ninche ajo olosho loo Siraeli. Neipoti sii aajo Ilhebrania… Ore teine nepuku, nebulu olaiguanani ng’ejuk leitu aekata eyiolou Yosefu. Ore pee edol ajo kumok ele osho loo Siraeli oleng’, neureshoyu. Nelotu aitaa ninche arashu neitaa ninche isinkan. Neureishoyu ajo ebaiki nedumakino ninche Ilmisiri, neidimu ninche o meitayu enkitanapata metaari pooki ayioni naini to Siraeli te ina olong’ eini ninye. Kake ore inkatoyiok o Ilhebrania neany ening’ enkitanapat e Farao.
Nerrip Enkai ninche neponari Ilhebrania te siana sapuk.
Netii apa olmare loo Siraeli oing’uaa olgilata le Lawi oat apa enkiti ayioni sidai. Neisudoo ninye tiatua empeut kiti neitadoiki ina peut atua olkeju le Nail. Ore Miriam, ina anashe botorr eina ayioni, neisudori pee edol enaikuna olalashe lenye kiti.
Ore teina rishata, nelotu entito olkinki le Misiri adou olkeju le Nail tenebo olchoreta lenyena, nedol ina kerai, neya ninye aitaa enkerai enye nedung’oki ninye enkarna ajo Musa. Nelotu Miriam enetii entito o Lkinki, neikilikuan ninye “Iyieu naing’uraki enkitok o Siraeli, pee kilotu aibung’aki ena kerai?” nejoki ninye ina tito o lkinki, “Ee ing’urakaki enkitok o Siraeli naa kalak ninye maing’uraki ena kerai.” Neishoori Musa ng’otonye enye meibung’a ninye. Ore pee ebulu enkerai aaku botorr, neya ng’otonye ayaki entito e Farao, neaku enkerai enye, nebul Musa te nkaji olkinki le Misiri.
Ore pee eaku Musa olee, ore nabo olong’ enetii iltung’ana lenye loo Siraeli. Ore teine nedol Olmisiri earita oltung’ani loo Siraeli. Neing’orisho nemelioo likae tung’ani too nchot pooki. Near Musa Olmisiri metua, neisudoo osesen lenye.
Neyiolouni ina bae, neisik musa alo aisudori torpukel.
Nedol Enkai olosilisili loo iltung’ana lenyena Isiraeli, nedamu Enkai olmumai oinos tialo Abraham, Isaka o Yakobo.