Ore etulusoitie ilarin tikitam o imiet eidipa Enkai eisiligie Abraham eishoi sapuk, neisho Sarah enkayioni anaa anatiaka Olaitoriani. Neji Isaak, enkipirta enye “enkuenia” amu etakuenia Sarah apa pee ejo Enkai iisho. Ore Isaak nebulu neaku olayioni.
Ore enkolong’ nabo, netem Enkai Abraham nejoki, “Abraham.” Nejo ninye, “Nele nanu.” Nejoki, “Toriko olayioni lino Isaak ilo laa ninye ake iata, ilo linyor, nipuopuo enkop e Moria, nintayu ninye te ine metaa olasar o pejori te nchumata o ldoinyo obo laaliki.”
Metaa einyo Abraham tadekenya enasirie neirot osikiria lenye, nerik ilbarnot lenyena oare tenebo olayioni lenye Isaak. Nedung’u ilkeek ooinokie olasar opejori nedumunye alo ewueji netiaka ninye Enkai. Ore te nkolong’ e uni, neraposhu Abraham inkonyek nedol ewueji nelakua. Nejoki Abraham ilbarnot lenyena. “Entotoni tene tenebo ele sikiria pee alo nanu o layioni idie aaseremisho peyie kintoki aashukunye.” Neya Abraham ilkeek ooinokieki olasar opejori, neiteleiki oloililai le Isaak enkayioni enye. Nenap te nkaina enye enkima o enkalem. Nepuo pokira are aairiamari.
Nejoki Isaak papaai lenye Abraham, “Papaai!” Nejo Abraham, “Nele nanu enkayioni ai.” Nejo Isaak, “Ing’ura ajo kiata enkima o lkeek paa koree doi olkuo le kerr likintainye olasar opejori?” Nejo Abraham, “Ekeisho Enkai kewan olkuo le kerr lo lasar opejori enkayioni ai.”
Kaae, nepuo pokira are aairiamari. Ore peyie ebau ewueji natuutaka Enkai ninye, neshetu Abraham olperere lo lasar te ine neirragie ilkeek aitobiraki, neen Isaak olayioni lenye, neirragie ninye te wueji o lasar te nchumata oo lkeek.
Neitorioo Abraham enkaina enye nedumu enkalem nayieng’ie enkayioni enye. Kake eipoto ninye olmalaika lo Laitoriani eng’uaa keper ejoki, “Abraham! Abraham!” Nejo ninye, “Nele nanu.” Nejo, olmalaika, “Minteleiki enkaina ino olayioni anaa intaas ninye ae, amu atayiolo taata ajo iure Enkai amu atoduaa ajo eitu kimitiki enkayioni ino naa ninye ake iata.”
Neraposhu Abraham inkonyek enyena aing’orisho nedol te siadi ninye olmeregesh otaasha entim imowuarak enyena, nelo Abraham aya ilo meregesh, neitayu ninye aitaa olasar opejori te rishata e nkayioni enye. Neipot Abraham ine wueji ajo, “Eneishorunye Olaitoriani.” Naa ina arna eeta ine o taata, ore to ldoinyo lo Laitoriani keishoruni.
Neitoki olmalaika lo Laitorriani aipot Abraham enkata e are eng’uaa shumata. Nejo, “Ainosa nanu omumai te kewan ai, ejo Olaitoriani, ‘Ore amu itaasa ena neitu imit enkayioni ino aa ninye ake iata, ekaamayian iyie oleng’, naa kaponaa eishoi ino metotiwuo anaa ilakir le keper netiu sii anaa osinyai le nkiyopata enaiposha. Ore eishoi ino neaku e nenye kishomi oo ilmang’ati lenye (nemir ilmang’ati lenye). Naa tiatua eishoi ino emayian iloshon le nkop pooki ate, amu itoning’o oltoilo lai.”