Ore nabo olong’ ketii Yesu te Yerusalem te rishata e Pasaka. Eiteng’ena iltung’ana tiatua enkolong’ pooki. Ore teipa, nelo ewueji neiragita. Etii apa oltung’ani lo Lfarisayo oji enkarna Nikodemo. Ore enkewarie, nelotu Nikodemo enetii Yesu, nejoki ninye, “Rabbi, kiyiolo aajo ira iyie olaiteng’enani oing’uaa Enkai; amu meetae oltung’ani oidim ataasa kuna kitoduaat nias iyie te nemeboitare Enkai ninye”
Newaliki Yesu ninye, “Esipa, esipa, aajoki iyie, te neitu eini oltung’ani aaigil te inoto naing’uaa shumata, nemeidim atoduaa Enkitoria e Nkai.”
Nejoki Nikodemo ninye, “Kaji eiko pee eidimi aatoiu oltung’ani etaa moruo?
Keidim ninye atushukokinoyu eniare enkoshoke e ng’otonye metoini?”
Newaliki Yesu ajoki, “Esipa, esipa, aajoki iyie, te neitu eini oltung’ani te nkare o te Nkiyang’et, nemeidim atijing’a Enkitoria e Nkai. Ore ina natoiwuoki to sesen, naa osesen, ore enatoiwuoki te Nkiyang’et naa enkiyang’et. Ming’asia te naajoki iyie, ‘Meeta nchere pee miking’ili aaiu.’”
Eton Nikodemu meibung’ enetejo Yesu nejoki ninye, “Kaji eiko pee eidim aataa kuna baa?”
Neaku eitadamua Yesu Nikodemo enaikununo enkatini oo inkera e Israeli apa pee etii tiatua ong’ata tenebo Musa. Neiro ninche imbaa torrok ti alo Enkai o Musa. Neing’unyung’uny ninche ejo, “Kainyoo pee iyaua iyiook aitupuku te nkop e Misiri maetu aaye tene tiong’ata? Amu metii endaa nemetii enkare, neitirika iyiook ena daa nemeeta tipat.” Negoru Enkai tenkaraki engolong’u enye neirriu ilasuriaa oopi atua iltung’ana. Neony ninche iltung’ana o metaa etuata ilkumok.
Nepuonu iltung’ana enetii Musa, nejoki, “Kitaasa iyiook eng’oki, amu kiroro iyiook mbaa torrok ti alo Olaitoriani o tialo iyie; toomono Olaitoriani pee eiwuang’ie ninye ilasuriaa te iyiook.” Neaku etoomonoko Musa iltung’ana. Nejoki Olaitoriani Musa, “Intobira olasurai lo suyai nipik shumata e ng’ape; naa te nelo neony olasurai likae tung’ani, neing’or ninye ilo asurai lo suyai nepok.”
Nejoki Yesu Nikodemo, “Ore anaa enailepie Musa olasurai ti ong’ata meeta nchere pee eitu eilepieki Enkerai e Tung’ani aaiko neijia, paa ore pooki ng’ae oiruk ninye netum enkishui nemeish. Amu etonyorra Enkai enkop aiko nji o meishoru Enkerai enye nabo, paa ore pooki ng’ae oiruk nemeimin kake netum enkishui nemeish. Ore ilo oiruk ninye nemeiguanareki, ore ilo lemeiruk neidipaki aaiguanare, amu eitu eiruk enkarna e Nkerai inoti nabo e Nkai.”