Ore apa olasurai naa aing’en oleng’ alang ing’uesi pooki naaitobira Olaitoriani Enkai. Ore enkolong’ nabo, etii enkitok atua enkurma e Eden. Nelotu olasurai enetii ninye. Nejoki olasurai, “Amaa, eji ketejo doi Enkai, “Eminya ilng’anayio lo lkeek pooki otii ena kurma?” Nejoki enkitok olasurai, “Mme neijia! Aikiindim iyiook aainosa ilg’anayio pooki loo lkeek le nkurma, kake etejo Enkai, “Eminya ilo ng’anayioi leilo shani otii empolos enkurma, olchani le ng’eno o supati o intorrok, nimiseyieyie hoo ninye arashu iyeye.’” Kake etiaka olasurai enkitok, “Miyeye ntae; amu eyiolo Enkai ajo ore tininosinoso ninye nebolo inkonyek inyi, nitiuu anaa Enkai, niyiolouu isupati o ntorrok.”
Ore peyie eing’or enkitok ilo shani nedol ajo sidai te ndaa, naa olchani sii oitiship inkonyek, naa olchani sii oiteng’en oltung’ani pee eng’enu, neitayu olng’anayioi neinos; neisho sii olpayian lenye embata, neinos sii ninye. Ore teinakata inkonyek e pokira nebolo, neyiolou ina kata aajo meishopo. Nerip mbenek aitaa nkilani aaisudoo iseseni.
Ore inakata nening’ ninche oltoilo lo Laitoriani Enkai elo te nkurma. Ore olpayian o enkitok enye neisudori tiatua ilkeek le nkurma peyie medol Enkai ninche. Kake eipoto Olaitoriani Enkai ilo tung’ani nejoki ninye: “Kaji itii iyie?” Neng’amaa ajoki, “Atoning’o oltoilo lino te nkurma, naureishoyu amu atoduaa ajo maishopo naipirri aisudori.”
Nejoki Enkai. “Amaa, aing’ae likitiaaka minchopo? Inosa olng’anayioi lo lchani laitanapa apa intae ajoki eminya?” Nejo ilo tunga’ni, “Ore ina kitok apa nikinchoo metaa tenebo nanu, ninye naaishoo olng’anayioi lo lchani mainosa.” Ina pee ejoki Olaitoriani Enkai enkitok, “Kaa bae ena nitaasa?” Nejo enkitok, “Olasurai laateleja nanya.”
Nejoki Olaitoriani Enkai olasurai, “Ore amu itaasa ena, kitediaaki iyie aaitulus too nkishu pooki o ng’uesi pooki entim, keaku iserpepiari te nkop, naa enterit ninye endaa ino, too nkolong’i pooki e nkishui ino. Ekapik olomang’ati erishata ino o enkitok. Neijia sii etiu erishata e ishoi ino o eishoi enye. Ekepurd ninye elukunya ino. Naa ore iyie niony entutunyo enye.”
Nejoki ninye enkitok, “Ore amu itaasa ena, kitediaaki iyie. Kaaponiki nanu emion te ishoi ino, te mion sapuk iiu inkera. Ore iyieunot inono pooki keaku ino lpayian lino, neaku sii ninye likintore iyie.”
Nejoki ninye Adam, “Ore amu itoning’o oltoilo le nkitok ino naa eitu kining’, ninosa ilo ng’anayioi lo lchani laaitanapa ajoki ‘Minya,’ etediaki enkop tenkaraki iyie, ekeaku enenkinyinyiret ake inya te nkishui ino pooki. Nebulu ilkiku o nkaitubulu torrok te nkurma, ometaba anaa nirrinyokino enterit, amu teine apa kintobiruaki. Ira enterit naa enterit irrinyokino.”
Neisho ilo tung’ani enkitok enye enkarna ng’ejuk ajo Hawa amu ninye ng’otonye oo iltung’ana pooki ooishu. Neitobiraki Olaitoriani Enkai Adam o enkitok enye inkilani oo ndapan, neishopoki ninche.
Nejo Olaitoriani Enkai, “Ng’ura, tenaing’uaa kulo tung’ana tiatua olchamba, keidim ninche aaitorioki enkaina enye olchani le nkishui aainosa, neishu ninche
intarasi.” Metaa eitayio Olaitoriani Enkai ninche te nkurma e Eden. Nearaa ninche pii, nepik Enkai olmalaika lo lalem oyupuyup pee errip enkoitoi olchani le nkishui.