Ore ena naa shakenisho e Yohana te Yesu. Ore pee ebulu Yohana neitayiolo kewon Israel. Nebuaku torpurkel nejo “Erridutu amu etinyikua enkitoria e shumata.” Neibatisa lelo pooki oirridutua tolkeju le Jordan.
Nedumakino ninye isiamon olorere epuo aaning’ nkiteng’enat enyena neibatisai. Kake ore lelo apolosak kituak olaiteng’enak loo nkitanapat, olarikok loo Israeli netobiko ninche te Yerusalem neirriwaki Yohana Olaibatisani ilkiliku lenye. Nejoki ninche ninye, “Iyie doi Kristo?” Newaliki Yohana ajoki, “Mara nanu Kristo.” Neikilikuan aajoki, “Ira Eliya?” Newal Yohana ajo, “A’a’” “Paa ira naa ng’ae!?” Nejoki Yohana, “Ara oltoilo lolobuaku tiong’ata, ‘Entorioi enkoitoi o Laitoriani.’ Etii ilo olotu tesiadi nanu, olaa ninye olkitok tenanu, amu etii ninye tedukuya nanu.”
Ore ake teina rishata, nelotu sii ninye Yesu neibatisa Yohana ninye. Ore ake pee eilepu tenkare, nedou Enkiyang’et Sinyati anaa enturkuluo adoiki ninye, nebolo shumata, nepuku oltoilo te shumata nejo, “Enkerai ai ena nanyor, natishipe teninye.”
Ore tenkolong’ nasujita ina, nedol Yohana Yesu eloito tenebo esiamo kitok, nejo, “Ing’ura! Olkuoo le kerr le Nkai oya ing’ok enkop! Ele taa atolimuo ajo, ‘Ore tesiadi nanu elotu o ltung’ani oituruk tenanu. Ninye olkitok tenanu amu etii ninye tedukuya nanu!’”