Ore pee elusoo enkidedidet e Yakobo olkedet. Nelo Yakobo enkop namanya ole nkapu lenye Laban. Ore eidupa Yakobo atotona olapa olulung’a, nejoki Laban ninye, “Amaa amu ira ole sotua, aimikisiai pesho? Kainyioo aalaaki te siai?
Ore tene neata Laban intoyie are, ore embotorr naa keji Lea, ore enkiti naa keji Raheli. Aitorrok inkonyek e Lea, kake ore Raheli naa aisidai ninye. Nenyorr apa Yakobo Raheli, nejo “Kasiai iyie ilarin, oopishana pee kincho entito ino kiti Raheli.”
Nejo Laban, “Enaikash tenaisho nanu ninye alang tenaisho nanu likae lee.
Totona tenebo nanu.” Neisiai Yakobo ilarin oopishana pee etum Raheli, kake nelioyu ninche anaa inkuti olong’I nena tenkaraki enyorrata nanyorr ninye Raheli.
Neigil Yakobo ajoki Laban, “Inchooki nanu enkitok ai amu eishunye erisha, nayieu nairagie nanu ninye.”
Neipotu taa Laban iltung’ana pooki leina manyisho, neitayu osirua. Kake ore pee elotu enteipa neyau entito enye Lea, neisho ninye Yakobo, neirragie Yakobo ninye … ore pee elotu enkakenya, nedol ajo Lea ina! Nejoki Yakobo Laban, “Kainyioo ena kintaasa? Aisiayia te nkaraki Rahelo, mme nejia? Kainyioo pee kiteleja?”
Newal Laban, “Meishiaa tolkuak lang pee eishori entito kiti meyami eton etii embotorr. Tonyuaa iishu e wiki, pee kincho iyi eina kiti aigil, tenikisiai kulikae arin oopishana.”
Neas Yakobo ina. Neishu ewiki pooki tenebo o Lea. Neigil taa Laban aisho ninye entito enye kiti meitaa enkitok enye. Neirragie Yakobo Raheli, nenyorru Raheli alang Lea. Neisiai Laban kulikae arin oopishana.
Ketii apa olom sapuk tialo Lea o Raheli. Keata apa Lea olom tenkaraki naa kiroretet Raheli. Neata ninye Raheli olom tenkaraki naata Lea ilayiok kumok eton ninye meata ninye obo. Kake ore te siadi neewuo atum Yosefu o Benjamin. Ore Lea neata ilayiok kumok, kulo Yuda, oewuo aaku emudong o Lyahudi kumok arikok anaa olkinki Daudi, neaku emudong e Yesu Kristo. Nemayian Enkai Yakobo, neisho ilayiok tomon oare. Ore hoo netetema Laban alej Yakobo kake etamayiana Enkai ninye te karsisisho