Ore pee elusoo ilapaitin aare pee epuku iltung’ana loo Siraeli te Misiri neun ilng’oborri te dukuya o Ldoinyo le Sinai. Neilep Musa alo oldoinyo, nejoki Enkai ninye, “Tiaki inkera oo Siraeli, ‘Itoduaa intae maate enaikuna pee aitajeuo intae aitung’uaa enkop e Misiri. Tenikianyititi intae katukul nimbung’ubung’u olning’o lai lo sotua, ore tiatua iloshon pooki niakuku intae iltung’ana laainei le tipat, enkitoria oo lapolosak o losho sinyati.” Ore pee ejoki Musa ninche neijia, nejo ninche, “Aikias pooki tooki natiaka iyiook Olaitoriani.”
Nejoki Olaitoriani Musa, “Tiaki iltung’ana meitisinya ate tiatua inkolong’i are amu kalotu te nkolong’ euni. Mincho oltung’ani hoo obo meibung’a oldoinyo ashu eye amu eisinyati ine.” Ore te nkolong’ euni, nedou enkatampoi nairrusha shumata oldoinyo tenebo o nkiwuang’at o ndarat, nepuku oltoilo laijo ole intarumpeta. Neikirikira oldoinyo. Neikirikira sii iltung’ana te nkuretisho. Neilep Musa alo oldoinyo neisho Enkai ninye inkitanapat tomon. Nejo:
Kara nanu Olaitoriani Enkai ino laaitayio aitung’uaa sinkaisho.
Neikirikira iltung’ana pooki. Nejoki Musa, “Musa, irorie iyie iyiook amu aikining’. Kake inchoo metaa me Enkai nairorie iyiook mikiye.” Nejoki Musa, “Miureishoyuyu. Keyieu Enkai niureyuyu ninye pee miasiasa ing’ok.” Neishoru Olaitoriani kulie kitanapat pee erikoo ninche anaa olosho loo Siraeli.
Ore te nkolong’ nasujita ina, neshet Musa olperere neitayu olasar lo sarge nejo, “Osarge ele lo lning’o oitobira Olaitoriani tenkaraki intae.” Nejo ninche, “Ekias pooki toki anaa enetejo Olaitoriani.” Neitoki aailep Musa tenebo o Yoshua enchumata oldoinyo, neisho Enkai Musa isoito aare dapashi tenebo inkitanapat naaigero Enkai to lkimojino lenye.