Ore pee eidip atoliki Isiraeli inkitanapat tomon, neilep Musa alo oldoinyo airorie Olaitoriani too nkolong’i artam. Ore pee edol iltung’ana ajo eimutie Musa to ldoinyo, nepuonu enetii Haron nejoki ninye, “Intobiraki iyiook inkaitin naapuo te dukuya iyiook. Amu mikiyiolo enataase te Musa.” Neitayu iltung’ana pooki ilgiso loo nkiyaa enye neyaki pooki Haron. Neya Haron lelo giso neitobirunyie olashe lo suyai. Nejoki ninche, “Kuna taa inkaitin inyi naaitaituo intae te nkop e Misiri.” Ore te shumata oldoinyo neitobiru Enkai kulie soito are dapashi o inkitanapat. Ore pee eidip aitobiru ninche nejoki Musa, “Eidipa iltung’ana laainei aaibelekenyata naaing’uaa nanu. Shomo tung’uaiyoki pee amut ninche!” Kake etasayia Musa Olaitoriani aitadamu olning’o lenye te rishata e Abraham, Isaak, o Yakobo pee memut iltung’ana lenyena.
Ore pee edoyio Musa to ldoinyo nedol iltung’ana eseremita olashe lo suyai negoro oleng’. Nenang’aa lelo soito aare dapashi nebelibel ninche. Nebuak to ltoilo sapuk ajo, “Ore pooki ng’ai oserem Enkai nasipa inchoo elotu enatii!” Ore tiatua iloshon pokira tomon oare loo Siraeli, nepuku olosho obo lo Lawi. Nejoki Musa ninche, “Entudumu pooki ilalema entumut lelo pooki ooserem olashe lo suyai!” Neye iltung’ana kumok teina olong’. Neirridu kulikae tung’ana ing’ok enye. Neitoki Musa ashuko alo oldoinyo aishiraki Enkai metapaliki ninche too ng’ok enye. Neitoki Enkai aisho Musa kulie soito aare dapashi o inkitanapat tomon. Naa nena kitanapat apa etipika Musa atua Osanduku lo Sotua. Ore te rishata naado to Ldoinyo le Sinai, neitoki Olaitoriani ariko ninche Isiraeli aitorioki Enkop e Nkisiligata.