Ore pee eidip Enkai atediaa Kain, enoto Kain enkitok neiu inkera. Netum sii Seti, olalashe le Kain, enkitok neiu sii ninye inkera.Ore te siadi, too ishoritin enye, neaku kumok oleng’ iltung’ana le nkop. Nenyor iltung’ana kuti ake Enkai, kake negolong’aki kulikae tung’ana kumok Enkai. Nearr olikae olikae too nkatitin pooki. Nedol Enkai ajo ore indamunot pooki o ltauja loo ltung’ana naa eitorrok pi! Ore pee edol Enkai ajo kaji eikunono inkiaasin torrok oo ltung’ana, nejo “Kamut tioriong’ enkop iltung’ana laaitobira, tenebo ing’uesi pooki.”
Kake enoto olpayian oji Noa omom too nkonyek o Laitoriani. Ore apa Noah naa oltung’ani oitashe too sipat. Neiriamariyie Enkai. Nejoki Enkai Noa, “kaata osina sapuk to ltau tenkaraki aitobira oltung’ani tenkop.” “Neaku, kamut tioriong’ enkop iltung’ana o ing’uesi pooki tenkaraki ing’ok sapuki oo ltung’ana. Kake kaitasheyie olning’o lo sotua lai o iyie, Noa. Iyie ake, Noa, oishu o ntomononi ino o ilayiok okuni linono tenebo intomonok enye. Kayieu nishet empeut sapuk, naji esafina, amu kayau ilopir le nkare sapuki oleng’ amut enkop. Ore pooki toki naishu o pooki sesen, ing’uesi o imotonyi, iyau maare e pooki pukunoto atua ena safina,aa olee o elipong’. Ore sii too ng’uesi sidain to lasar, iyau iloin’gok oopishana o lipong’a naapishana. Iyau endaa sii.”
Neliki Enkai Noa eneiko teneitobir esafina. Neliki ajoki pee epik emilanko nabo. Neas Noa pooki toki natolikio Enkai ninye. Neasisho Noa ilarin iip nabo o tikitam ashet esafina. Ore pee eidip Noa atasheta esafina, neliki Enkai ninye ajoki lasima pee ejing esafina tenebo olmarei lenye o ing’uesi pooki. Neaku etaasa Noa neijia. Neiken Enkai emilanko.
Nedanya Enkai inkonyek oo nkariak naagut naaruko. Neshaiki enchan e shumata enkop inkolong’i artam o nkewaritin artam. Nenukari enkop pooki tenkare, ata ildoinyio oodo. Neaku meidim ilkulikai tung’ana ailanya enkeeya. Kake ore Noa o lmarei lenye o inguesi natii esafina naa eitajeuoki tiatua esafina tioriong’ enkare.
Ore pee eidipayu inkolong’i artam, Nedamu Enkai Noa neitasheiyie enchan.
Nebik Noa tiatua esafina olari olulung’a. Nedoyio inkariak pee eirragie esafina oldoinyo. Nejoki Enkai Noa o lmarei lenye, “Entupuku te safina.” Nepuku Noa o lmarei lenye o ng’uesi aaing’ua esafina. Neshetaki Noa Olaitoriani ewueji olasar, neitaki Enkai olasar opejori neserem Enkai.
Neshipa Enkai tenkaraki olasar. (Etishipakine Enkai olasar.) Nejo Enkai, “Maitoki aekata amut enkop te nkare.” kapikaki olokirrai lai atua enkatampoi naa keaku olmonekie lo sotua lai o enkop.
Neliki Enkai Noa o lmarei lenye pee eisho inkera kumok neiput Enkop anaa enatolikio Adam o Hawa. Nejoki Enkai Noa, “Kaaisho ing’uesi pee eaku endaa. Kake, minya osarge. Ore oloibukoo osarge lo ltung’ani, naa oltung’ani oibukoo osarge lenye, amu eitayio Enkai oltung’ani te nkitanyaanyukoto enye makewan.” Ilayiok le Noa eishoo inkera kumok neaku iltung’ana kumok tenkop.