Ore ejoito iloiteng’eni le Yesu imbaa o ilalashera oing’uaa Emmaus, neitashe Yesu makewan ti atua ninche, nejoki, “Entaseriana!” Kake eirriang’a ninche, neureishoyu, ejo koloip etoduaa. Nejoki Yesu ninche, “Ainyoo pee inyamalala? Naa kaji etiu pee etii olng’ash iltauja linyi? Eng’ora nkaik aainei o nkejek nchere kewan ai nanu ele; embung’aki pee idolidolo; amu meeta enkiyang’et nkiri o loik anaa kulo lidolitata aata.” Ore pee ejoki neijia, netoidol nkaik enyena o nkejek. Ore eton ake meiruk te nkaraki eng’ida e nking’asia nejoki ninche, “Iatata tene toki nanyae?” Neisho embelati o sinkirri oyiera, nedumu nenya te dukuya ninche.
Nejoki ninche, “Ilapa rorei laainei kulo latiaaka intae, eton atii te nebo intae, inchere ore mbaa pooki naatisiraki aaipirta nanu too nkitanapat e Musa o too loibonok le Nkai o to Lkerempe le Nkai, meeta nchere meitabari. Nebol iltauja lenye metayiolo ilkigerot, nejoki ninche, “Etisiraki aajo, keitamei Kristo naa ore te nkolong’ e uni nepiu aing’uaa lootuata, naa te nkarna enye elikiori enkirridunoto o empalakinoto oo ng’ok loo loreren pooki, neiteruni te Yerusalem. Irara intae shakeni le kuna baa. Naa ng’ura, kairriwaki intae ilo otejo Papa keisho intae; kake entotoni te na anasa, o meishopokini intae engolon naing’uaa shumata.”
Neitoki arik o metabaiki Betania, neilepie nkaik enyena nemayian. Ore emayianita ninye ninche, neilep aing’uaa ninche. Nerrinyo ninche aapuo Yerusalem te ng’ida sapuk, netii anaa ake enkaji e Nkai eisisita Enkai.