Ore eidipa Yakoboa tobiko ilarin kumok tenebo ole nkapu lenye Laban, nemayiani too luat sapuki o nchoo, o nkera kumok o olaisiayiak kumok. Negelu ajo etaa erishata sidai nashuko ninye alo Kanaan, hoo neton apake eure olalashe lenye Esau, apa oteleja tialo imayianat e papai lenye.
Ore etaa ebaiki Kanaan neirriwaa Yakobo inkishoorot kumok o nchoo airriwaki Esau etem aing’oru omom te ninye eton eitu ebau. Nepuonu ilaikitalak anang’are ninye, nejoki inchere egira Esau alotu anang’are ninye erikito enjore o lewa iip ong’uan. Neureshoyu Yakobo, neomon Enkai, “Nai e papa lai Abraham, nai e papa lai Isaka, Olaitoriani laa ninye laatiaka tushukoyu enkop inyi o enetii entalipa ino, pee amayian, manarikino nanu nena pooki nikintaasa eimu enyorrata ino nauno, nikintol ajo ira oloisiligayu atoomono tasaruaki te nkaina e Esau.
Aisiligata atua enkisiligata ino pee intaa eishoi ai anaa osunyai le naiposha.”
Ore ake peyie ebaiki olkeju le Yordan, neirriwaa, neisho Yakobo inkituak enyena metalanga olkeju, nebik ninye openy teilo kekun loo lkeju enkewarie pooki. Ore etii ninye ine, nepupung’are oltungani Yakobo enkewarie pooki. Ore pee ekenyu, ore pee elaikino oltung’ani atanangai ninye, neibung oloudo, nepuku ninye oloudo terubata, nejo, “Inchooki mashomo, amu ekenyua.” Kake nejoki Yakobo, “Maisho shomo meteleku tenikimayian nanu.”
Nejoki ilo tung’ani ninye, “meitoki aekata enkarna ino aaku ekiji Yakobo, kake Israeli, amu itapupungare iyie Enkai o iltung’ana, nindimua pooki. Nejoki Yakobo, “aitoduaa Enkai king’ura too nkomomi neitajewuoki enkishui ai arashu etasaruaki enkishui ai.”
Ore ake aa enalusorie Olmalaika, nedol Yakobo Esau. Neirrugo, aitadou kewan tedukuya Esau, neng’amu Esau ninye tolng’ur o tempalikinoto sii, eigira aing’asiakino eneikuna Enkai pee emayiana Yakobo. Neibalunyie Yakobo eneba empiris e Nkai naishoo ninye inkera. Neisho Yakobo Esau inkishorot oo nkishu, ejoito, “ore pee adol enkomom ino natiu anaa olotodua enkomom e Nkai, neisualaki kitang’amua te nkoitoi kirotet naijo ina.” Ore pee elusoo ena neitoki Yakobo o Esau aabik to sotua ilarin kumok.