Ore isikarini o Roma naa etara Yesu oleng’ nepik sii olmarisian loo ilkiku elukunya enye pee esurdaany ninye. Newo osarge te nkomon o ti oriong’. Ore pee eidipa Pilato aishoo isikarini metoriko Yesu metashei, nearaki Yesu anap Osalaba lenye te inkoitoi e Yerusalem. Ore pee enauru oleng’ pee meitoki aidim atanapa, nearaki likae tung’ani anap. Nepuo auluo mpaka endoinyo nataaniki Yerusalem.
Ore pee ebaiki ele doinyo, neshe ninche Yesu tenebo ilapurrok oare. Nepik isikarini ilkeek aare te nkop aikonji anaa esalaba nepik Yesu te dukuya ninche.
Neen naa neudo sii inkaik o inkejek enye to lkeek too lmushumari. Neilepie msalaba shumata nepik te nkumoto meitashe. Neton isikarini te nkop neorikino inkilani lenyena, neoshie enkukuo pee etum oloya.
Ketii iltung’ana kumok aing’orita kuna baa. Netii inkituak naatusujutua Yesu.
Netii sii ilapolosak o ilaiteng’enak oo inkitanapat. Negira aikordodisho nejo, “Eitajeuo ilkulikae nemeidim aitajeu kewan.
Nemor sii olapurroni obo Yesu kake etejo olikae, “Tigirayu amu ore iyiook kitaasa intorrok. Eishiakino pee kiye, kake eitu eas ele tung’ani entoki torrono.” Neliki sii ninye Yesu, “Tadamuoki tinijing’ enkitoria ino.” Newaliki Yesu, “Esipa aajoki iyie, ata taata, ijing’ Paradiso te nebo nanu.”
Neaku saa ile enaipirie enkolong’, nerip enaimin enkop pooki o metabaiki saa naaudo, neimis ewang’an e nkolong’. Ore Yesu, nebuaku to ltoilo sapuk, nejo, “Papa, inkaik inono apik enkiyang’et ai!” Nejo sii, “Eidipe! Ore pee ejo neijia nedung’o tau. Ore ena kata, neiperra nabo kata olkarasha le nkaji e Nkai aaku are, aiteru te shumata o metabaiki abori, neikirikira enkop nedanya ndapidapo. Ore ilo kitok loo sikarini oorripito Yesu o lelo ootii te nebo ninye, pee edol eikirikire enkop o kulie baa naatotiwuo, neureishoyu oleng’ ejo, “Esipa Enkerai e Nkai ele tung’ani.”
Ore too lkuaak lo Lyahudi, meing’uari seseni te shumata o salaba te nkolong’ e sabato. Neomon Pilato metigili ninche inkejek neiwuang’ieki aaya. Neaku eetuo isikarini apa negil inkejek o ilapurrok pee esioki aaye. Kake ore pee epuonu enetii Yesu, nedol aajo eidipa atua, neitu egil inkejek enyena. Kake etaremo osikari obo ematua te remet, nepuku osarge o enkare.
Ore te siadi nena, neisho oloiteng’eni le Yesu olmeneng’ani lenye nepik atua enkurare ng’ejuk neton eitu ae kata eirragieki likae. Neiken to soito sapuk. Ore tenkaraki Sabato enkolong’ nasuja, neirragie Yesu te ine.