Ore pee eidip ainosa emisa e Pasaka, nelotu Yesu o ilooiteng’eni lenye ewueji neji Getsemane nejoki ninche, “Entotoni tene mashomo ende aomon.” Nerik Petero, Yakobo, Yohana ewueji nataana. Nejoki, “Eeta oltau lai osina kitok o metaa kaye; entotoni te ne enchololoto te nebo nanu.” Nelo openy aigut neirrabalaakino enkop neomon nejo, “Papa lai, te naa keidimayu intapaashaki ena kikompe, kake mme anaa enayieu nanu kake anaa eniyieu iyie.”
Nelotu enetii ilooiteng’eni neinepu eirurate, nejoki Yesu, “Amaa ai mindimidimi hoo aaishololoto te nebo nanu esaa nabo? Enchololoto niomono pee mijing’ijing’i intemat; esipa eyieu oltau, kake eshal osesen.” Neitoki alo enkata e are neomon. Neitoki alotu, neinepu ninche eirurate. Neitoki aing’uaa ninche nelo aomon enkata e uni. Neitoki ashukokino ilooiteng’eni lenyena nejoki, “Keton doi ake irurara aayeng’iyeng’a! Eng’ura etinyikua esaa napikieki Enkerai e Tung’ani inkaik oo looata ng’ok. Enyeito emaape; eng’ura, nelde olaakaldaa otabawua.”
Ore eirorita, ng’ura, nelotu Yudas eboitare isikarini laaing’uaa ilarikok oo Lyahudi. Neiroroki Yudas Yesu neng’utut pee eitodol isikarini. Neibung’ Yesu neya enetii ilarikok loo Lyahudi. Neisik ilooiteng’eni le Yesu pooki tenkuretisho.
Neng’as aya Yesu enkaji o Lapolosani Kitok. Nepuonu iltorrok kumok meiteeniki elejare enaikununo Yesu, kake etigire neitu ewaliki Yesu. Neitoki aikilikiuan olapolosani kitok, “Ira iyie Kristo?” Nejo Yesu, “Ee, ara.” Ore pee ening’ neijia nepolos olapolosani kitok ilkilani lenyena nejo, “Ainyoo kintoki aayieunye lchakenini? Itoning’okito ate emoroto namor Enkai. Ijoja aa?” Nedung’oki pooki enkiguana aajo keishiakino keeya.
Ore ake pee ekenyu, neya Yesu enetii olkitok loo Lroma oji Pilato. Neikilikuan Pilato, “Ira doi iyie Olaiguanani loo Lyahudi?” Newaliki ajoki, “Ee, kara, kake ore enkitoria aim me ene ena kop.”
Nerik Pilato Yesu neidong’ te nkeene; neiroro Ilyahudi nejo, “Eitu atumie hoo enkitarruorroto.” Kake nebuak Ilyahudi, “Tasho! Tasho!” Neureshoyu Pilato neishoo Yesu meshomo aashe.