Ore pee eidip Yohana aibatisa Yesu, nemanaa Yesu aiteng’enisho te nkanasa o nkanasa. Neaku ore pooki wueji nelo Yesu nesuj ilororani. Neman ninche ninye ometaa keitanyamal oleng’. Ore nabo olong’ nejing’ Yesu enkaji te Kapernaum.
Neiteng’enisho, neiput olorora enkaji oleng’ o metabaiki boo. Neaku kerumisho iltung’ana too lusien oo too nkutukajini enkaji. Negira pooki aaininingu’ inkiteng’enat e Yesu.
Netii apa oltung’ani oilenya otii Kapernaum. Neata ilchoreta oong’uan, nedumu ninche ilo tung’ani oilenye o endapash enye aayaki Yesu. Kake eitu etum ninche empaash pee eitabaiki enetii Yesu. Neaku etakedo ninche shumata enkaji pee eng’er neitadoyio oltung’ani oilenye tedukuya Yesu tenebo endapash enye. Ore ake pee edol Yesu eneba enkirukoto e kulo shoreta nejoki, “Kitapalikiaki ing’ok inono.” Netii ine ilaiteng’enak loo nkitanapat oogira aainining’ Yesu. Ore ake pee ening’ kulo rorei, negorokino Yesu oleng’. Nejo tiatua iltauja lenye, “Kainyoo pee eidim ninye atejo inji? Enkai ake makewan naidim atapalaki ing’ok!”
Kake etayiolo ninye Yesu indamunot enye, nejoki ninche, “Kaa nalelek?” Etenajo nanu, “Kitapalikiaki ng’ok inono,” ana tenajoki, “Inyo! Tudum erruat ino! Shomo ang’!”? Kake ore pee itumutumu aatayiolo nchere keeta Enkerai e Tung’ani enkidimata tenkop napalakinyie ng’ok.”
Ina pee ejoki Yesu ilo tung’ani oilenye, “Tudumunye! Tudum erruat ino! Shomo ang’!” Nedumunye oltung’ani alo, nedumunye nabo kata, nedum erruat enye neipung’ alo tedukuya ninche pooki! Neing’asia ninche pooki oleng’ neisho Enkai enkisisa nejo, “Eitu aikata kidol embae enking’asia naaijio ena!”