Ore pee eidip Enkai atokordu Isiraeli tenkop e Misiri, nerikoo ninche te nkatampoi eng’ape te dama, nerikoo te nkatapampoi enkima te nkewarie. Eitu erikoo ninche aitorioki enkop e Kanaan, kake nerikoo ninche to lpurkel tembata enaiposha nanyokie. Nejo Enkai, “Kedamu Farao ajo kelaikino Isiraeli aashom. Nesujaa Farao ninche, kake katum enkitoo makewan eimu Farao o enjore enye. Neiyiolou Ilmisiri nchere ara nanu Olaitoriani.”
Ore pee eyiolou Farao ajo eshomoita ninche, nejo, “Kainyoo kitaasa? Kinchoo irrindiki lang’ epuo pesho!” Neya ingarin oo mbartan o njore enye nesujaa ninche iltung’ana loo Siraeli, neinepu ninche tembata enaiposha nanyokie. Nelaikino Isiraeli aaisika.
Ore pee edol iltung’ana loo Siraeli Ilmisiri etinyikutua neureishoyu oleng’.
Nejoki Musa, “Musa, ainyoo pee iyaua iyiook olpurkel mayetu aidaaya. Amu enaikash apa te iyiook tenikisiai Emisiri alang’ tenkieye to lpurkel!” Nejoki Musa iltung’ana, “Emiureishoyu. Entashoito katukul metii orng’ash pee idolidolo enjeunoto Olaitoriani. Amu ore kulo Misiri lidolitata taata mintokiki aikata aadol. Amu kejing’ Olaitoriani olarrabal tenkaraki intae metaa entirring’ata.”
Nejoki Olaitoriani Musa, “Tudumu ilepie eng’udi ino nintorioo enkaina ino te shumata enaiposha toosho, pee etum iltung’ana loo Siraeli aashom tenkop natoyio te mpolos e naiposha. Neitashe enkatampoi eng’ape te rishata enye o Lmisiri.
Neitorio Musa enkaina enye te shumata enaiposha neor Olaitoriani Enaiposha Nanyokie nepuku enkop natoyio. Nepuo iltung’ana loo Siraeli aaim enkop natoyio etii esunta e nkare te tatene o te kedienye.
Nesujaa ninche Ilmisiri tiatua enkotoi natoyio. Ore tadekenya enasirie neisirng’ang’ie Olaitoriani enjore oo Lmisiri, aun nkejek oo ngarrin enye metupurpurro te lototo; nejo Ilmisiri, “Emaisika te dukuya Iloosiraeli; amu kemitu ninche Olaitoriani aing’arraki Ilmisiri.”
Neitoki Olaitoriani ajoki Musa, “Ntorioi enkaina ino te shumata enaiposha, pee eshukunye enkare shumata Ilmisiri, o shumata ingarrin enye oo mbartan. Neas neijia. Neshukunye inkariak neimisie ingarrin oo mbartan o ina jore pooki e Farao; eitu ninye eleku obo lenye.
Neiko neijia Olaitoriani aitajeu Isiraeli ina olong’ too nkaik oo Lmisiri; nedol Isiraeli Ilmisiri etuata te mbata e naiposha. Nedol Isiraeli esiaai sapuk naitaasa Olaitoriani Ilmisiri, neureyu iltung’ana Olaitoriani; neiruk ninche Olaitoriani olaisiaayiani lenye Musa.