Ore eiding’akino iltung’ana aamanita Yesu einining’u ilomon le Nkai, neitashe Yesu te mbata e naiposha e Galilaya, nedol impeuti are eirrag te mbata e naiposha. Netupukutuo ilarreshok loo sinkir aapuo aaisuj irresheta lenye. Nejing atua empeut nabo, naa ene Simon, nejoki meturrumoi peno aitalam enkop natoyio. Neton Yesu aiteng’en olorere etonita ninye ti atua empeut.
Ore pee eidip airoro nejoki Simon, “Terewa enegut nintadoikiki irresheta linyi enaiposha aaibung’ isinkir.” Nejoki Simon, “Lo Kitok, kitaasishote enkewarie nalulung’a neitu kitum toki, kake ore amu itejo, kaitadoyio irresheta.” Ore pee eiko neijia neibung olkito turrur loo sinkir neiteru aang’era irresheta lenye. Neyuku ilchoreta lenye Yohana o Yakobo otii enkae peut meetu aaret. Nepuonu, neiput impeuti pokira are, o metaa keimis.
Ore pee edol Simon Petero ina nebatata too nkejek e Yesu, ejoki, “Olaitoriani, tung’uayioki nanu amu, kara oltung’ani loo ng’ok.” Amu eing’asie ninye o lelo ooboitare, te nkumoi oo sinkir ooibung’a.
Nejoki Yesu Simon, “Miureishoyu; ore ebaiki taata, iltung’ana intorioo aibung.” Neyau mpeuti enkop natoyio, neing’uaa pooki toki nesuj ninye.
Ore pee elusoo inkolong’i kuti nelo Yesu, nedol oltung’ani osotu kodi oji Lawi (ashu Matayu), eton te wueji nesotunye kodi; nejoki, “Tusujuaki nanu.” Neing’uaa pooki toki, neinyototo asuj Yesu.
Neitoomon Lawi ninye to sirua kitok netii esiamo kitok oo loosotu kodi o kulikae ake oodaa te nebo ninche. Neing’unyung’unyaki Ilfarisayo o lasirak aajo, “Ainyoo pee ing’arierie endaa niokishosho te nebo iloosotu kodi o laing’okok?”
Newaliki Yesu ajoki, “Imeyieu iltung’ana biyot olkitari, iloomuoi ooyieu. Eitu alotu aipot lelo supati kake ilaing’okok meetu aairridu.”
Ore nabo olong’, neilep Yesu alo oldoinyo aomon, neton enkewarie pooki eomonito Enkai. Ore pee ekenyu neipot ilooiteng’eni lenyena negelu tomon o aare ti atua ninche nejo ninche Ilkipaareta. Naa Simon (keipoto Yesu ninye ajo Petero) o Anterea olalashe lenye; o Yakobo o Yohana, o Matayo o lkulikai tenebo Yuda Iskariot.