Ore apa tenkiterunoto pee eitobira Enkai keper o enkop, eitobirua Enkai olpayian o enkitok te nkolong’ e ile. Kayieu naliki intai kaji eiko pee etaasa Enkai neijia.
Ore te dukuya, etuuno Enkai olchamba sidai. Neitubulu te nkop ilkeek pooki oitiship inkonyek naa sidain sii te ndaa. Ore te mpolos e nkurma, etuuno ilkeek oare oata tipat oleng’, naa Olchani le Nkishui o Olchani le Ng’eno oo supati o ntorrok. Naa eitobira oltung’ani te nterit enkop. Nekutaki inkumeishin enyena entooma e nkishui, neaku oltunga’ni oloota enkishui. Ore enkarna enye naa keji Adam.
Kepik ilo tung’ani oitobira atua olchamba peyie etur neramat sii. Neitanap Olaitoriani Enkai oltung’ani ajoki, “Ore pooki shani otii atua enkurma indim ainosa, kake ore olchani le ng’eno oo supati o ntorrok minya ake, amu ore kenya enkolong’ ninya, meeta inchere pee miye.”
Neaku ore pee eing’or Olaitoriani Enkai Adam nejo, “Meishiaakino neton olee aa ninye ake, ekaitaiki enkaretoni naishaakino ninye.” Neaku keyau Olaitoriani Enkai ng’uesi o inkishu o motonyi pooki enetii Adam, pee edung’oki inkarn enyena. Ore pee edol Adamu ing’uesi pooki etodua ajo metii enkaretoni naishaakino ninye.
Metaa etipika Olaitoriani Enkai injo naairoshi ilo tung’ani meirurayu. Ore eirura, neitayu olarasi obo lenye nenuk ine wueji too nkiri. Ore ilo arasi oitayio Olaitoriani Enkai te ilo tung’ani neitaa enkitok, nerikoki ninye ilo tung’ani. Ore pee edol Adamu enkitok enye eing’asia, nejo, “Esipa ele taata oloito loo loik laainei, naa eoroti osesen lai. Ekeipoti ninye aajo enkitok amu eitayioki ninye tiatua olee.”
Metaa eorore olee menye o ng’otonye, neibung’are enkitok enye neaku pokira are osesen obo. Ore apa ilo tung’ani o enkitok enye meeta apa entoki naishopito nemedol enkurruna.